రాష్ట్రంలో గత ఏడాది అత్యధిక రోడ్డు ప్రమాదాలు డిసెంబరు నెలలో జరిగాయి. మొత్తంగా జనవరి, ఫిబ్రవరి, నవంబరు, డిసెంబరు నెలల్లో.. ప్రతి మాసంలో నెలకు 2 వేలకు పైగా ప్రమాదాలు చోటుచేసుకున్నాయి. మిగతా నెలల్లో ఈ స్థాయిలో జరగలేదు. దీనినిబట్టి శీతాకాలం ప్రమాదాలకు నెలవుగా మారుతోందని నివేదికలు చెబుతున్నాయి. పొగ మంచుతో ఎదురుగా వచ్చే వాహనాలు కనపడని పరిస్థితే ఇందుకు ప్రధాన కారణం కావచ్చని, అప్రమత్తంగా ఉండాలని నిపుణులు సూచిస్తున్నారు.
Road Accidents in Telangana : డిసెంబర్ వచ్చేస్తోంది.. వాహనదారులూ బీ కేర్ఫుల్! - December is the road accidents month
శీతాకాలం వచ్చేసింది. అలాగే రోడ్డు ప్రమాదాల నెల వచ్చేస్తోంది. పొగమంచుతో వాహనాలు కనపడని పరిస్థితులు దగ్గరలోనే ఉన్నాయి. ఈ పరిస్థితులే డిసెంబర్ నెలలో రోడ్డు ప్రమాదాలు అత్యధికంగా జరగడానికి కారణమవుతున్నాయని నివేదికలు చెబుతున్నాయి. అందుకే ఈ నెలలో వాహనాదారులు అప్రమత్తంగా ఉండాలని.. వీలైనంత వరకు తెల్లవారుజాము ప్రయాణాలు మానుకోవాలని సూచిస్తున్నాయి.
Road Accidents in Telangana
రాష్ట్రవ్యాప్తంగా 2020లో 19,172 ప్రమాదాలు జరగగా.. 18,661 మంది గాయపడ్డారు. 6,882 మంది మృత్యువాతపడ్డారు. ఈ ప్రమాదాలకు కారణాలు? ఏ సమయంలో? ఏ వాహనాలు ఎక్కువగా ప్రమాదాల బారినపడ్డాయి? తదితర అంశాలపై తెలంగాణ రోడ్డు భద్రత విభాగం పరిశీలనలో పలు కీలక అంశాలు వెల్లడయ్యాయి. అధిక దుర్ఘటనలకు ద్విచక్ర వాహనదారులే కారణమని, అధిక వేగం కారణంగానే 78.12 శాతం ప్రమాదాలు జరిగాయని గుర్తించారు. అలానే రాత్రి 6 నుంచి 9 గంటల మధ్య ఎక్కువ ప్రమాదాలు చోటుచేసుకున్నాయి. జాతీయ రహదారుల కంటే అంతర్గత మార్గాల్లోనే ఎక్కువ మంది మృత్యువాత పడగా.. పట్టణ ప్రాంతాలకంటే గ్రామీణ ప్రాంతాలే ఎక్కువగా ప్రమాదాలకు నెలవుగా మారాయి.