Revanth Reddy Latest Comments: తెరాస, భాజపాలపై పీసీసీ అధ్యక్షుడు రేవంత్రెడ్డి తీవ్రస్థాయిలో విమర్శలు చేశారు. భాజపా, తెరాస నాయకులు ముఠాలతో, మూటలతో ఓట్లు కొల్లగొట్టేందుకు వచ్చారని ఆరోపించారు. ఈ ఉపఎన్నిక నియోజకవర్గ అభివృద్ధికి రాలేదని.. ఒక వ్యక్తి అమ్ముడుపోతే వచ్చిందని కోమటిరెడ్డి రాజగోపాల్‌రెడ్డిని ఉద్దేశించి తీవ్రస్థాయిలో ఆరోపించారు. మొక్కలా పెంచి పెద్ద చేసిన కన్నతల్లి లాంటి పార్టీకి రాజగోపాల్‌రెడ్డి ద్రోహం చేసి శత్రువు పంచన చేరాడని విమర్శించారు.
మునుగోడు ప్రజలను మోసం చేసేందుకు కేసీఆర్, కేటీఆర్, హరీశ్‌రావు హామీలు ఇస్తారని ఆరోపించారు. దత్తత పేరుతో కొడంగల్‌ ప్రజలను మోసం చేసిన కేటీఆర్.. ఇప్పుడు మునుగోడుకు వచ్చి అవే మాయమాటలు చెబుతున్నారని మండిపడ్డారు. చిన్న ముల్కనూరు, మూడు చింతలపల్లి, లక్ష్మపూర్ను కేసీఆర్ దత్తత తీసుకొని ఏం చేయలేదని మండిపడ్డారు. రేపో మాపో మునుగోడుకు సీఎం కేసీఆర్ వస్తారని.. కుర్చీ వేసుకొని ఇక్కడే కూర్చుంటానని.. మునుగోడుకు సముద్రం తెస్తానని చెబుతారని ఎద్దేవా చేశారు.
స్రవంతిని గెలిపిస్తే సారక్కలా ప్రజల తరుఫున..:ఎన్నికలు ముగిసిన తర్వాత కేసీఆర్ మళ్లీ ఫామ్‌హౌస్‌కే పరిమితం అవుతారని రేవంత్రెడ్డి వ్యాఖ్యానించారు. 2014లో కూసుకుంట్ల ప్రభాకర్‌రెడ్డి ఎమ్మెల్యే అయ్యారు.. మునుగోడులో ఏమైనా అభివృద్ధి జరిగిందా అని ప్రశ్నించారు. ఈ మాయగాళ్ల వలలో మునుగోడు ప్రజలు పడొద్దని సూచించారు. ములుగులో గెలిచిన సీతక్క సమ్మక్కలా ప్రభుత్వంపై పోరాడుతోందని.. అదే విధంగా స్రవంతిని గెలిపిస్తే సారక్కలా ప్రజల తరుఫున ఉద్యమిస్తుందని రేవంత్రెడ్డి హామీ ఇచ్చారు.