ఛత్తీస్గఢ్లోని బీజాపూర్ జిల్లాలో పోలీసులు నియమించిన 25 మంది రహస్య పోలీస్ ఏజెంట్లు, కోవర్టులు, ఇన్ఫార్మర్లను ప్రజాకోర్టులో శిక్షించినట్లు మావోయిస్టు పార్టీ సంచలన ప్రకటన విడుదల చేసింది. గంగలూర్ ప్రాంతంలో 12 మంది ఏజెంట్లు, ఐదుగురు కోవర్టులు, 8 మంది పోలీస్ ఇన్ఫార్మర్లను గుర్తించి ప్రజల మద్దతుతో శిక్షించినట్లు భారత కమ్యూనిస్టు పార్టీ మావోయిస్టు దండకారణ్య జోనల్ కమిటీ అధికార ప్రతినిధి వికల్ప్ పేరుతో లేఖ విడుదల చేశారు. ఈ ఘటనకు పూర్తి బాధ్యత బస్తర్ పోలీస్ ఐజీ సుందర్ రాజ్, బీజాపూర్ ఎస్పీ కమలోచన్ కశ్యప్లే వహించాలని మావోయిస్టు పార్టీ డిమాండ్ చేసింది.
కేంద్ర, రాష్ట్ర ప్రభుత్వాలు విప్లవోద్యమాన్ని నిర్మూలించేందుకు మోసపు ఎత్తుగడల్లో భాగంగా సమాధాన్ యోజనను చేశారని లేఖలో విప్లవ్ పేర్కొన్నారు. 2022 నాటికి విప్లవోద్యమాన్ని నిర్మూలిస్తామని ప్రకటించి.. ఇందుకు పెద్దఎత్తున పోలీసు ఏజెంట్లను నియమించుకున్నారని ఆరోపించారు. ఏజెంట్లకు ప్రత్యేక బ్యాంకు ఖాతాలు ఇచ్చి నెల నెలా జీతాలు జమ చేస్తున్నారన్నారు. రహస్య ఏజెంట్లు ఉద్యమ కేంద్రాలైన గ్రామాల్లో పాగా వేసి రహస్యంగా తమ కార్యకలాపాలు కొనసాగించారని తెలిపారు. పోలీసులు తయారు చేసిన ఇన్ఫార్మర్లు కూంబింగ్ సమయాల్లో గైడ్లుగా వ్యవహరించారని, కొంతమంది ప్రజా నాయకులను అరెస్టు చేయించారన్నారు.