కర్ఫ్యూ ఎఫెక్ట్:​ ఏపీ ప్రభుత్వ కార్యాలయాల పనివేళల్లో మార్పులు

ఏపీ ప్రభుత్వం కీలక నిర్ణయం తీసుకుంది. పగటి పూట కర్ఫ్యూ నేపథ్యంలో ప్రభుత్వ కార్యాలయాల పనివేళల్లో మార్పులు చేస్తూ ఆదేశాలు జారీ చేసింది. ఈ మేరకు ఉదయం 8 గంటల నుంచి ఉదయం11.30 గంటల వరకు మాత్రమే ప్రభుత్వ కార్యాలయాలు పనిచేస్తాయని ఉత్తర్వుల్లో పేర్కొంది.

ఏపీలోని ప్రభుత్వ కార్యాలయాల పని వేళల్లో మార్పులు చేస్తూ ఆంధ్రప్రదేశ్​ ప్రభుత్వం ఆదేశాలు జారీ చేసింది. మధ్యాహ్నం 12 గంటల తర్వాత పగటి కర్ఫ్యూ అమలు చేస్తున్నందున పని వేళలను తాత్కాలికంగా మారుస్తూ ఉత్తర్వులు జారీ చేసింది. ఈ మేరకు ఉదయం 8 గంటల నుంచి ఉదయం11.30 గంటల వరకు మాత్రమే ప్రభుత్వ కార్యాలయాలు పనిచేస్తాయని ఉత్తర్వుల్లో పేర్కొంది.

సచివాలయం, ఉన్నతాధికారుల కార్యాలయాలు, జిల్లా కార్యాలయాలు, సబ్ డివిజనల్ కార్యాలయాల్లో ఈ సమయాలు అమల్లోకి వస్తాయని ప్రభుత్వం తెలిపింది. కొవిడ్ మేనేజ్​మెంట్ విధులు నిర్వహించే శాఖలు, వైద్య ఆరోగ్య శాఖ, విద్యుత్ శాఖ, మున్సిపల్ పరిపాలన, పంచాయతీరాజ్ శాఖలకు పనివేళల్లో మార్పులు ఉండవని, వీరు గత సమయవేళల ప్రకారమే పనిచేయాల్సి ఉంటుందని స్పష్టం చేసింది.

ఇవీ చూడండి:అత్యవసర కేసుల విచారణకు సీజేఐ మార్గదర్శకాలు