ఏపీలో రాజధాని అమరావతికి సంబంధించి దాఖలైన పిటిషన్లపై ఆ రాష్ట్ర హైకోర్టులో రోజువారీ విచారణ ప్రారంభించింది. ఈ వ్యవహారానికి సంబంధించి ప్రధానమైనవి, అనుబంధ పిటిషన్లు కలిపి 100 వరకు దాఖలయ్యాయి. ఇవాళ 15 పిటిషన్లపై హైకోర్టు ప్రధాన న్యాయమూర్తి జస్టిస్ జె.కె.మహేశ్వరి నేతృత్వంలోని ధర్మాసనం విచారణ జరిపింది. ప్రభుత్వం తరపున అడ్వకేట్ జనరల్ శ్రీరాం, పిటిషనర్ల తరపున మిగతా న్యాయవాదులు ఆన్లైన్ ద్వారా తమ వాదనలు వినిపించారు.
పూర్తి వివరాలు సమర్పించాలి...
రాజధాని వికేంద్రీకరణ, సీఆర్డీఏ రద్దు బిల్లుల అంశంపై శాసనమండలి సెలక్ట్ కమిటికి పంపినా... వాటిని చట్టం చేయటంపై అభ్యంతరం వ్యక్తం చేస్తూ దాఖలైన పిటిషన్పై విచారణ జరిపారు. అయితే ఈ అంశంపై శాసనమండలిలో జనవరిలో జరిగిన పూర్తి చర్చల వివరాలు, సీడీలు సీల్డ్ కవర్లో సమర్పించాలని ఏపీ హైకోర్టు ఆదేశించింది. ఈ రెండు అంశాలకు సంబంధించి గతంలో ఇచ్చిన స్టేటస్ కో ఉత్తర్వులు కొనసాగుతాయని కోర్టు స్పష్టం చేసింది.
ఇక రాజధాని పిటిషన్లు విచారణలో ఉండగా.... విశాఖలో అతిథిగృహం నిర్మాణానికి చర్యలు ప్రారంభించడంపై దాఖలైన పిటిషన్ని విచారించింది. అసలు ముఖ్యమంత్రి వసతి కోసం నిర్మాణాలకు సంబంధించి ఎలాంటి నిబంధనలు ఉన్నాయో చెప్పాలని హైకోర్టు కోరినట్లు న్యాయవాది లక్ష్మీనారాయణ తెలిపారు. ఈ కేసు తదుపరి విచారణ ఈనెల 9వ తేదికి వాయిదా వేశారు.
డీజీపీ పిటిషన్పై విచారణ
ఇక పోలీసు కార్యాలయాల ఏర్పాటుకు సంబంధించి డీజీపీ ఓ కమిటీ ఏర్పాటు చేయటాన్ని... ఆ కమిటీ విశాఖలో పర్యటించటంపైనా దాఖలైన పిటిషన్పై విచారణ జరిగింది. చట్టం అమలు కాకుండా ఎలా ఇలాంటి కమిటీలు వేస్తారని పిటిషనర్లు అభ్యంతరం వ్యక్తం చేశారు. ఇది కూడా 9వ తేదీన విచారణ జరుపుతామని న్యాయస్థానం తెలిపింది. గతంలో స్టేటస్ కో ఉత్తర్వులు ఇచ్చిన పిటిషన్లపై 9వ తేదీన తుది విచారణ ఉంటుందని ధర్మాసనం చెప్పినట్లు హైకోర్టు న్యాయవాది లక్ష్మీనారాయణ వెల్లడించారు.
ఇదీ చదవండి:ఆంగ్లమాధ్యమం అంశంలో ఏపీ పిటిషన్పై సుప్రీంకోర్టులో విచారణ
