పది రోజుల్లో జిల్లాలు, నియోజకవర్గాల వారీగా అర్హుల జాబితా సిద్ధం కానుంది. ప్రభుత్వం ఆదేశించినప్పుడు కంప్యూటర్‌ లాటరీతో అర్హుల పేర్ల నుంచి ఎంపిక చేస్తారు. కార్పొరేటర్లు, ఎమ్మెల్యేలు, మంత్రులకు ఎలాంటి కోటా ఉండదని, ఆ పేరుతో దళారులు అమాయకులను మోసం చేస్తున్నారని అధికారులు అన్నారు. సగటున ఒక్కో నియోజకవర్గం నుంచి 4వేల మంది లబ్ధిదారులు ఎంపికకానున్నారు.
- లక్ష ఇళ్లలో ఇప్పటికే 30వేల ఇళ్లు నిర్మాణం పూర్తి చేసుకున్నాయి. మిగిలిన ఇళ్లు వేర్వేరు దశల్లో ఉన్నాయి. మురికివాడల ఆధునికీకరణ పథకంలో భాగంగా.. స్థానికులకే అక్కడ నిర్మిస్తోన్న ఇళ్లను కేటాయిస్తున్నారు. మిగిలిన ఇళ్లను లాటరీ విధానంలోకి మళ్లిస్తారు.
- మీసేవా కేంద్రాలు, జిల్లా కలెక్టర్లకు అందిన 6లక్షల దరఖాస్తులను జీహెచ్‌ఎంసీ కమిషనర్‌ ఆధ్వర్యంలో టీఎస్‌టీఎస్‌ పరిశీలిస్తోంది.
- ఇవీ మార్గదర్శకాలు..
- 2018 శాసనసభ ఓటరు జాబితాలో పేరుండాలి. స్థానిక చిరునామాతో ఆధార్‌, రేషన్‌కార్డు, చిరునామా ధ్రువపత్రం ఉండాలి
- గ్రామీణ, పట్టణ గృహాలు, ఇందిరమ్మ, జేఎన్‌ఎన్‌యూఆర్‌ఎం, ఐహెచ్‌ఎస్‌డీపీ, వాంబే, ఆర్‌జీకే, ఇతరత్రా పథకాల కింద గతంలో లబ్ధి పొందినవారు..అలానే జీవో 58, 59 లబ్ధిదారులు అనర్హులు.
- గ్రేటర్‌లోని 24 శాసనసభ స్థానాలతో సంబంధంలేని నియోజకవర్గాల్లోనూ ఇళ్లు నిర్మాణమయ్యాయి. ఆయా చోట్ల.. 10 శాతం(1000 ఇళ్లకు మించకుండా) స్థానిక నియోజకవర్గానికి కేటాయిస్తారు.
- నియోజకవర్గాల వారీగా కులం, దివ్యాంగులు, ఇతర రిజర్వేషన్ల ప్రాతిపదికన లబ్ధిదారులను ఎంపిక చేస్తారు. నగరాన్ని తూర్పు, పశ్చిమ, దక్షిణ, ఉత్తర క్లస్టర్లుగా విభజించి, వాటి పరిధిలోని నియోజకవర్గాలకు అక్కడున్న నిర్మాణ సముదాయాల్లో ఇళ్లు కేటాయించేలా మ్యాపింగ్‌ చేశామని జీహెచ్‌ఎంసీ స్పష్టం చేస్తోంది.