Ongole Bulls in Akhanda Movie : ఇవే.. అఖండ సినిమాలో బాలయ్య పిలవగానే రంకెలేసిన పోట్ల గిత్తలు...! చూపులో పౌరుషం, నడకలో రాజసం, కొమ్ముల్లో వాడిని వెండితెరపై ప్రదర్శించిన ఒంగోలు జాతిఎద్దులు.! బాలకృష్ణ 'బసవా' అనగానే దుమ్మురేపుతూ ఫ్రేమ్‌లోకి ఒక్కసారిగా దూసుకొచ్చి థియేటర్లను హోరెత్తించాయి. సినిమాలో అంతలా కట్టిపడేసిన ఈ ఎద్దులు ఆంధ్రప్రదేశ్లోని గుంటూరు జిల్లాకు చెందినవే.!
ప్రత్యేక శిక్షణ..
Ongole Bulls in akhanda : అఖండ సినిమాలో ఆరంభ, ముగింపు సన్నివేశాలను ఈ గిత్తలు రక్తికట్టించాయి. బాలయ్య బసవా అని పిలవగానే కొమ్ములు విసురుతూ విలన్ల భరతం పట్టాయి. కథలో బసవన్నలు కీలకం కావటంతో దర్శకుడు బోయపాటి శ్రీను గుంటూరు, కృష్ణా, ప్రకాశం జిల్లాల్లో ఆరా తీశారు. వెతకబోయిన తీగ కాలికి తగిలినట్లు బోయపాటి పక్కఊరైన కొప్పురావూరులోనే ఇవి కనిపించాయి. ఇక అంతే బోయపాటి అడగం, యజమాని సరే అనడం, సీన్లు చిత్రీకరించడం జరిగిపోయాయి. కాకపోతే వేగంగా పరిగెత్తడం, ఆగడంపై గిత్తలకు శిక్షణ ఇచ్చాకే కెమెరా ముందుకు తీసుకెళ్లారు.