అందుబాటులోకి ఆర్టీఏ ఆన్​లైన్ సేవలు.. వాహనదారులకు తప్పిన తిప్పలు

ఇంటి నుంచే ఆన్​లైన్ సేవలు పొందేందుకు రవాణాశాఖ ఏర్పాట్లు చేసింది. కరోనా సమయంలో కార్యాలయాల చుట్టూ తిరిగి వాహనదారులు ఇబ్బందులు పడకుండా ఈ నిర్ణయం తీసుకుంది. ప్రస్తుతం 11 ఆన్​లైన్ సేవలు మాత్రమే ప్రజలకు అందుబాటులో ఉన్నాయి. వీటితో పాటే ఆఫ్​లైన్ సేవలు కూడా రవాణాశాఖ కార్యాలయాల్లో యథావిధిగా కొనసాగుతున్నాయి. మాస్క్​లు ఉన్నవారినే రవాణాశాఖ కార్యాయాల్లోకి అనుమతిస్తున్నారు. భౌతిక దూరం పాటించేలా సర్కిళ్లు ఏర్పాటు చేశారు. కార్యాలయంలోకి ప్రవేశించే ప్రాంతంలో వాహనదారులకు థర్మల్ స్క్రీనింగ్​తో పాటు, శానిటైజేషన్ చేస్తున్నారు.

కరోనా వ్యాప్తి నేపథ్యంలో రవాణా శాఖ ఆన్​లైన్ సర్వీసులను విస్తృతం చేసింది. ఆర్టీఏ సేవల కోసం కార్యాలయాలకు రావాల్సిన అవసరం లేకుండా ప్రస్తుతం 11 సర్వీసులను ఆన్​లైన్​లో అందిస్తుంది. ఒకప్పుడు రవాణాశాఖకు సంబంధించిన ఏ సేవలు పొందాలనుకున్నా... ఖచ్చితంగా ఆర్టీఏ కార్యాలయాలకు వెళ్లాల్సిందే. గంటల తరబడి కార్యాలయాల్లో నిల్చోవడం, తీరా అక్కడికి వెళ్లిన తర్వాత అది లేదు.. ఇది లేదని తిప్పించుకోవడం వంటి తిప్పలు వినియోగదారులకు తప్పేవి కావు. కానీ ఇప్పుడు అవన్నీ లేవు. ఇంట్లోనే కూర్చుని తమకు కావాల్సిన సేవలు సంతోషంగా పొందవచ్చని రవాణాశాఖ అధికారులు పేర్కొంటున్నారు.

ఈ ఏడాది జూలై 24న రవాణాశాఖ మంత్రి పువ్వాడ అజయ్​కుమార్ ఐదు ఆన్​లైన్ సేవలను ఖైరతాబాద్​లోని రవాణాశాఖ కార్యాలయంలో ప్రారంభించారు. ఇటీవలి కాలంలో మరో 6 ఆన్​లైన్ సేవలను రవాణాశాఖ అందుబాటులోకి తీసుకొచ్చింది. మొత్తం కలిపి 11 సేవలను రవాణాశాఖ ఆన్​లైన్​లో అందిస్తుంది.

ప్రస్తుతం రవాణాశాఖలో లభిస్తున్న ఆన్​లైన్​ సేవలు..

• డూప్లికేట్ లైసెన్స్
• డూప్లికేట్ లెర్నర్స్ లైసెన్స్
• డ్రైవింగ్ లైసెన్స్ బ్యాడ్జీ (రవాణా వాహనాల కోసం)
• స్మార్ట్ కార్డ్ (పాత పీవీసీ కార్డు లైసెన్స్ స్థానంలో కొత్తది తీసుకోవడం)
• లైసెన్స్ హిస్టరీ షీట్
• డ్రైవింగ్ లైసెన్స్ పునరుద్ధరణ(రెన్యూవల్)
• డ్రైవింగ్ లైసెన్స్​లో చిరునామా మార్పు
• గడువు ముగిసిన లెర్నర్స్ స్థానంలో కొత్త లెర్నర్స్ లైసెన్స్
• వాహన తరగతిని చేర్చడానికి లైసెన్స్
• ప్రమాదకర వస్తువులు తరలించే వాహనాల లైసెన్స్ ఆమోదించడం
• గడువు ముగిసిన లైసెన్స్​కు లెర్నర్స్ లైసెన్స్ జారీ.

చిరునామా మార్చుకోవడంలో తప్పిన తిప్పలు..

గ్రేటర్ హైదరాబాద్​లో ఎక్కువ శాతం మంది అద్దె ఇళ్లలోనే నివాసముంటుంటారు. ఏడాదికో, రెండేళ్లకొకసారో ఇల్లు మారాల్సి వస్తే... డ్రైవింగ్ లైసెన్స్ చిరునామా కూడా మార్చుకోవాల్సి ఉంటుంది. ఒకప్పుడు ఇల్లు మారితే డ్రైవింగ్ లైసెన్స్​లో చిరునామా మార్చడం ఓ ప్రహసనంగా ఉండేది. ఆన్​లైన్​లో స్లాట్ బుక్ చేసుకోవడం.. నిర్ణీత తేదీ, సమయానికి దగ్గర్లోని ఆర్టీఏ కార్యాలయానికి వెళ్లడం.. అక్కడ దళారులతో ఇబ్బంది పడాల్సివచ్చేది. అన్నీ అయిపోతే.. సంబంధిత లైసెన్స్​కు సంబంధించిన ఫోటో దిగి, డిజిటల్ సంతకం పెడితే మనవంతు పని ముగుస్తుంది. ఆ తర్వాత లైసెన్స్​ను ఇంటికి పంపించడంలో అనేక ఇబ్బందులు తలెత్తేవి. స్మార్ట్​కార్డుల కొరత ఉంటే డ్రైవింగ్ లైసెన్స్ పోస్టులో ఇంటికి రావడానికి వారాలు, నెలల వరకు వాహనదారులు ఎదురు చూడాల్సిన పరిస్థతి. ఆన్​లైన్ సర్వీసులు అందుబాటులోకి తీసుకొచ్చిన తర్వాత ఇబ్బందులు తగ్గిపోయాయని వాహనదారులు అంటున్నారు.

టీ-యాప్​ ఫోలియోలో లాగిన్ అయ్యి..

ఆన్​లైన్ సేవల కోసం గూగుల్ ప్లే స్టోర్​లోని టీ-యాప్​ ఫోలియోలో లాగిన్ అయ్యి వాహనదారుడు తనకు కావాల్సిన ఆన్​లైన్ సేవలు పొందవచ్చని రవాణాశాఖ అధికారులు తెలిపారు. ఉదాహరణకు లైసెన్స్​లో చిరునామా మార్పు చేసుకోవాలంటే... కొత్త చిరునామా వివరాలు నమోదు చేసి నిర్ణీత ఫీజు చెల్లిస్తే చాలు. అవసరం మేరకు మొబైల్ ఫోన్ నుంచే తాజా ఫోటోను, డిజిటల్ సంతకాన్ని అప్​లోడ్ చేస్తే సరిపోతుంది. రవాణా శాఖ కార్యాలయానికి వెళ్లకుండానే అడ్రస్ మార్పుతో కొత్త డ్రైవింగ్ లైసెన్స్ ఇంటికి వచ్చేస్తుంది.

తగ్గిన ఇబ్బందులు..

ఆన్​లైన్ సేవలతో సమయం కలిసి రావడంతో పాటు నేరుగా ఆర్టీఏ కార్యాలయాలకు రావాల్సిన అవసరం తగ్గిపోయిందని వాహనదారులు సంతోషం వ్యక్తం చేస్తున్నారు. గంటల తరబడి కార్యాలయాల్లో వేచి ఉండాల్సిన ఇబ్బందులు లేవని వాహనదారులు పేర్కొంటున్నారు

ఇవీ చూడండి:వ్యవసాయబిల్లును వ్యతిరేకించండి.. తెరాస ఎంపీలకు సీఎం ఆదేశం