18 ఏళ్లు దాటిన వారికి టీకా ఎలా..?

వచ్చేనెల 1వ తేదీ నుంచి 18 ఏళ్లు దాటిన వారికి టీకాలను అందజేయడానికి కేంద్ర ప్రభుత్వం ఇటీవల పచ్చజెండా ఊపడంతో.. ఆ మేరకు రాష్ట్ర ప్రభుత్వం సన్నాహాలు ప్రారంభించింది. 18-44 ఏళ్ల మధ్యవయస్కులు సుమారు 1.82 కోట్ల మంది ఉన్నారు. ప్రస్తుతం వీరికి ప్రభుత్వం ఆధ్వర్యంలో ఉచితంగా అందిస్తారా? లేదా? అన్నదానిపై స్పష్టత రాలేదు.

18 ఏళ్లు దాటిన వారికి వ్యాక్సినేషన్​ అందజేసే కార్యాచరణపై ఆరోగ్యశాఖ దృష్టి పెట్టింది. ఒకవేళ ప్రైవేటు ఆసుపత్రుల్లోనే టీకాలను అందజేస్తే.. ఇందుకు అవసరమైన ఏర్పాట్లు చేయడంపై సమాలోచనలు చేస్తోంది. 45 ఏళ్లు దాటిన వారితోపాటు అదనంగా 18 ఏళ్లు దాటిన వారు కూడా ప్రైవేటులో టీకాలు పొందాల్సి వస్తే.. కార్యక్రమం సజావుగా కొనసాగేందుకు ఆరోగ్యశాఖ ప్రణాళికలు రూపొందిస్తోంది.

ప్రైవేటులో రద్దీ

రాష్ట్రంలోని ప్రైవేటు ఆసుపత్రుల్లో ఇప్పటికే 45 ఏళ్లు దాటిన వారికి టీకాలను అందజేస్తున్నారు. వచ్చే మే 1 నుంచి 18 ఏళ్లు దాటినవారికి టీకాల పంపిణీని ప్రైవేటుకే పరిమితం చేస్తే.. పరిస్థితి ఏమిటనే సందిగ్ధం నెలకొంది. ప్రభుత్వాధ్వర్యంలో ఈ వయసు వారికి కూడా టీకాలు అందించాలంటే.. అందుకయ్యే ఆర్థిక భారాన్ని రాష్ట్ర సర్కారే భరించాలి. దీనిపై రాష్ట్ర స్థాయిలో నిర్ణయం జరగలేదు. ఒకవేళ ప్రైవేటు ఆసుపత్రుల్లో మాత్రమే నిర్వహిస్తే.. వాటిల్లో రద్దీ పెరిగే అవకాశాలున్నాయి. రద్దీని నివారించడానికి కొవిడ్‌ చికిత్సలతో సంబంధం లేకుండా ప్రత్యేక కేంద్రాలను ఎంపిక చేయాలని భావిస్తున్నట్లు వైద్యవర్గాలు తెలిపాయి.

ఈనెల 28 నుంచి రిజిస్ట్రేషన్‌ ప్రక్రియ ఆన్‌లైన్‌లో అందుబాటులోకి రానుండటంతో.. ఆలోగా ఎక్కడెక్కడ ప్రైవేటులో కేంద్రాలు ఏర్పాటు చేస్తారనే సమాచారాన్ని కేంద్ర ప్రభుత్వం దృష్టికి తీసుకెళ్తారు. ప్రైవేటు ఆసుపత్రులు పెద్దసంఖ్యలోనే టీకాల పంపిణీకి ముందుకొచ్చే అవకాశాలున్నట్లు వైద్యవర్గాలు భావిస్తున్నాయి. టీకాల నిల్వకు అవసరమైన ఏర్పాట్లు చేసుకోవాలని ప్రైవేటు ఆసుపత్రులను కోరనున్నట్లు పేర్కొన్నాయి. టీకా ధరను బట్టి ఎంత మేరకు లబ్ధిదారులు సొంతంగా ముందుకొస్తారనే సందేహాలు వైద్యవర్గాలను వేధిస్తున్నాయి.

సంబంధిత కథనం: 18 సంవత్సరాలు నిండిన ప్రతి ఒక్కరికి టీకా