రాష్ట్రంలో భారీ వర్షాలు.. నేడో రేపో రుతుపవనాల రాక

రాష్ట్రవ్యాప్తంగా పలు ప్రాంతాల్లో కుంభవృష్టి కురవగా.. రుతుపవనాలు ప్రవేశానికి ముందే పలు జిల్లాలు తడిసి ముద్దయ్యాయి. ములుగు, యాదాద్రి, ఆదిలాబాద్‌ మెదక్‌ జిల్లాల్లో భారీ వర్షాలు కురవగా... అత్యధికంగా భువనగిరిలో 17.04 సెం, మీటర్ల వర్షపాతం నమోదైంది. పలుచోట్ల కురిసిన వర్షానికి రహదారులు జలమయమవ్వగా... మరికొన్ని ప్రాంతాల్లో చెట్లు నేలకొరిగాయి. రాగల 48 గంటల్లో నైరుతి రుతుపవనాలు విస్తరించే అవకాశం ఉందని, కొన్ని చోట్ల మోస్తరు నుంచి భారీ వర్షాలు కురిసే అవకాశం ఉందని వాతవరణశాఖ పేర్కొంది.

ఎడతెరపి లేకుండా కురిసిన వర్షానికి హైదరాబాద్ తడిసి ముద్దయింది. నగరంలో కురిసిన వర్షానికి పలు ప్రాంతాలు జలమలయయ్యాయి. బంజారాహిల్స్ రోడ్ నెంబర్ 45లో రోడ్డుపై పెద్ద వృక్షం విరిగిపడింది. సమాచారం అందుకున్న నగర మేయర్‌ బొంతు రామ్మోహన్‌ డీఆర్​ఎఫ్​ బృందంతో ఆ వృక్షాన్ని తొలగింపజేశారు. మేడ్చల్ జిల్లా మల్కాజిగిరి నెరేడ్‌మెట్‌లో ఈదురు గాలులతో కూడిన భారీ వర్షం కురిసింది. పలు కాలనీల్లో విద్యుత్ స్తంభాలు, చెట్లు విరిగాయి. తార్నాక, ఓయూ క్యాంపస్, లాలాపేట్ అబ్సిగూడ, నాచారంలో ఒక్కసారిగా భారీ వర్షం కారణంగా నీరు రోడ్లపైకి చేరింది. కుత్బుల్లాపూర్ నియోజకవర్గంలో భారీ వర్షం కురిసింది. కొంపల్లి, సుచిత్ర, దుండిగల్, జీడీమెట్ల, షాపూర్‌నగర్, జగద్గిరిగుట్ట, చింతల్, బాలానగర్ ప్రాంతాలు జలమయమయ్యాయి.

గాలివాన బీభత్సం..

నిర్మల్‌లో గాలివాన బీభత్సం సృష్టించింది. బలమైన ఈదురు గాలులు వీయడంతో పలు చోట్ల భారీ వృక్షాలు నేలరాలాయి. మంచిర్యాల జిల్లా బెల్లంపల్లిలో ఉరుములు మెరుపులతో కూడిన వర్షానికి చెట్లు నేలకొరిగాయి. సిరిసిల్ల జిల్లా ముస్తాబాద్‌ మండలం బదనకల్‌ గ్రామంలో పిడుగుపాటుకు ఓ రైతు మృతి చెందాడు. ఉమ్మడి వరంగల్ జిల్లాలో పలు చోట్ల వర్షం కురిసింది. హన్మకొండ, వరంగల్, కాజీపేటల్లో రహదారులు జలమయమయ్యాయి. ధర్మసాగర్, వేలేరు మండలాల్లో భారీ వర్షం కురిసింది. బచ్చన్నపేట, తరిగొప్పులు, నర్మెట్లలో అక్కడక్కడ ఉరుములు, మెరుపులతో వర్షం కురిసింది.

ఉమ్మడి నల్గొండ జిల్లాలో..

ఉమ్మడి నల్గొండ జిల్లాలో పలు చోట్లు మోస్తరు నుంచి భారీ వర్షాలు కురిశాయి. భువనగిరి, బీబీనగర్, పోచంపల్లి, వలిగొండ మండల కేంద్రాల్లో భారీ వర్షం కురిసింది.ఆలేరు,యాదగిరిగుట్ట, మోటకొండూర్ ,రాజపేట,మండలాల్లో మోస్తరు వర్షం కురిసింది. తుర్కపల్లి, బొమ్మలరామారం మండలాల్లో రెండు గంటల ఏకధాటిగా వర్షం కురవడంతో ఎండ నుంచి ప్రజలకు ఉపశమనం కలిగింది. యాదగిరిగుట్ట మండలంలోని పలు గ్రామాల్లో చెట్ల కొమ్మలు విరిగిపడ్డాయి.

భారీ నుంచి అతి భారీ

నేడు అక్కడక్కడ ఉరుములు, మెరుపులతో పాటు తేలికపాటి నుంచి ఓ మోస్తారు వర్షాలు అనేక చోట్ల కురిసే అవకాశం ఉందని హైదరాబాద్ వాతావరణ కేంద్రం తెలిపింది. రాష్ట్రంలో శుక్రవారం భారీ నుంచి అతి భారీవర్షాలు కురిసే అవకాశాలు ఉన్నాయని వాతవరణ కేంద్రం పేర్కొంది.