హైదరాబాద్​లో కర్నూలు రైతుల నిరసన

ఆరుగాలం కష్టపడి పండించిన పంట కొనుగోలు చేసి చెల్లించాల్సిన బకాయిలు చెల్లించకుండా కంపనీ యాజమాన్యం ముఖం చాటేసింది. న్యాయం చేయాలని ఆశ్రయించిన పోలీసులు పట్టించుకోవడం లేదు. ఎలాగైనా తమ కష్టార్జితం రాబట్టుకునేందుకు కర్నూలు నుంచి హైదరబాద్​కు వచ్చి నిరసనకు దిగారు.

కర్నూలు జిల్లా నందికొట్కూరుకు చెందిన రైతుల దగ్గర నాలుగేళ్ల క్రితం ఎస్​ఎన్​ఎస్​ కంపెనీ మొక్కజొన్న పంట కొనుగోలు చేసింది. కానీ ఇంత వరకు డబ్బులు మాత్రం చెల్లించలేదు. అప్పటి నుంచి కంపెనీ యాజమాన్యం దాటవేస్తూ వచ్చింది. దీనిపై​ పోలీసులకు ఫిర్యాదు చేసినా పట్టించుకోవడం లేదని రైతులు ఆవేదన వ్యక్తం చేశారు.

బకాయిలు చెల్లించకుండా ముఖం చాటేసిన యాజమాన్యం తీరుకు నిరసనగా రైతులు ఆందోళన బాట పట్టారు. 20మంది రాత్రి కర్నూలు నుంచి హైదరాబాద్​కు వచ్చి వ్యాపారి జిలాని ఇంటి ముందు వంటావార్పుతో నిరసన తెలిపారు. తమకు రావాల్సిన 80 లక్షలు చెల్లించే వరకు ఆందోళన విరమించేది లేదని స్పష్టం చేశారు. దీనిపై మీడియా వివరణ కోరగా కంపెనీ ఉద్యోగి నిర్లక్ష్యపు సమాధానంతో దాటవేశారు.

ఇదీ చూడండి:రహదారిపై రారాజుల సంచరిస్తూ.. భయం పుట్టిస్తున్న పెద్దపులి