హయత్​నగర్​ యువతి కిడ్నాప్​ కథ సుఖాంతం

హయత్‌నగర్‌లో యువతిని అపహరించిన నిందితుడు ఎట్టకేలకు ఒంగోలులో పట్టుబడ్డాడు. కిడ్నాప్‌కు గురైన యువతి ఈరోజు హైదరాబాద్‌కు చేరుకుని... తెలిసిన మహిళ సహకారంతో తల్లిదండ్రులకు సమాచారమిచ్చింది. అక్కడికి చేరుకున్న పోలీసులు ఆమెను సరూర్‌నగర్ మహిళా పోలీస్ స్టేషన్‌కు తీసుకెళ్లారు.

హయత్​నగర్​లో అపహరణకు గురైన ఇబ్రహీంపట్నం బొంగులూర్​కు చెందిన యువతి కథ ఎట్టకేలకు సుఖాంతమైంది. ఈ రోజు తెల్లవారుజామున ఎంజీబీఎస్ చేరుకున్న యువతి... తెలిసిన మహిళ సాయంతో తల్లిదండ్రులకు సమాచారం అందించింది.

యువతి స్టేట్​మెంట్​ రికార్డు

యువతి తండ్రి సమాచారం అందించిన వెంటనే పోలీసులు ఎంజీబీఎస్​కు చేరుకొని యువతిని సరూర్ నగర్​లోని మహిళా పోలీస్ స్టేషన్​కు తీసుకెళ్లారు. అపహరణకు సంబంధించిన వివరాలను యువతి నుంచి సేకరించారు. వారం రోజుల పాటు నిందితుడు తనను ఎక్కడెక్కడికి తీసుకెళ్లాడనే విషయాన్ని అడిగి తెలుసుకున్నారు. ఉద్యోగం కోసం పలు చోట్ల తిరుగుతున్నట్లు చెప్పాడని, తన తండ్రితో ఫోన్​లో మాట్లాడుతున్నట్లు నమ్మించాడని... బాధితురాలు తెలిపింది. యువతి స్టేట్​మెంట్​ రికార్డు చేసుకున్న తర్వాత పేట్లబురుజు ఆస్పత్రిలో వైద్య పరీక్షలు నిర్వహించారు.

బెదిరించి 80 వేల రూపాయలు వసూలు

నిందితుడు రవిశేఖర్ పోలీసుల కన్నుగప్పి వారం రోజుల పాటు పలుచోట్ల తిరిగాడు. సోమవారం ఉదయం నల్గొండ జిల్లా కొండప్రోలు గ్రామానికి వచ్చి ఎరువుల దుకాణ యజమానిని బెదిరించి రూ.80వేల నగదు, 3 ఉంగరాలు వసూలు చేసినట్లు పోలీసులు గుర్తించారు.

అక్కడ పట్టుబడ్డాడు...

నల్గొండ జిల్లా కొండప్రోలు నుంచి గుంటూరు మీదుగా అద్దంకి వెళ్లి అక్కడ యువతిని హైదరాబాద్ బస్సు ఎక్కించినట్లు పోలీసులు భావిస్తున్నారు. యువతి హైదరాబాద్ చేరుకున్న విషయం పోలీసులకు తెలిసిన వెంటనే అద్దంకి, ఒంగోలు పోలీసులను అప్రమత్తం చేశారు. వాహనాలు తనిఖీ చేస్తుండగా.... రవిశేఖర్ మంగళవారం పోలీసులకు పట్టుబడ్డాడు.

ఇవీ చూడండి:ప్రభుత్వం ఏకపక్షంగా వ్యవహరిస్తోంది: జీవన్​రెడ్డి