Farmers Protest: రాష్ట్రంలో భూ సమస్యలకు శాశ్వత పరిష్కారమంటూ ప్రభుత్వం తీసుకొచ్చిన ధరణి పోర్టల్లో లోపభూయిష్ఠ సాంకేతికతను నిరసిస్తూ రైతాంగం పోరుబాట పట్టింది. ధరణి పోర్టల్లో తప్పుల తడకలున్నాయంటూ హైదరాబాద్ అబిడ్స్ భూపరిపాలన కార్యాలయం ముందు రైతులు ఆందోళనకు దిగారు. సుదీర్ఘకాలంగా వేధిస్తున్న సమస్యలు పరిష్కరించాలని డిమాండ్ చేస్తూ.. గ్రామ, మండల, డివిజన్ స్థాయిలో ఆందోళనలు చేపట్టినా ఫలితం లేకపోవడంతో మహబూబాబాద్‌ జిల్లా కేసముద్రం మండలం నారాయణపురం గ్రామ రైతులు హైదరాబాద్లోని భూపరిపాలన కార్యాలయం ముట్టడించారు.
కార్యాలయం ఎదుట బైటాయించి ప్రభుత్వం, భూపరిపాలన శాఖ వైఖరిని నిరసించారు. సర్కార్ పారదర్శకతకు మారు పేరు అంటున్న ధరణి పోర్టల్లో తలెత్తుతున్న అనేక తప్పులు రైతులకు తిప్పలు అంటూ బాధిత రైతులు ఆక్షేపించారు. అధికారుల నిర్లక్ష్యం రైతులకు శాపంగా పరిణమించిందంటూ ధ్వజమెత్తారు. 60 ఏళ్ల పట్టాలు కలిగి ఉండి.. నేటికీ సాగులో ఉన్న 1,827 ఎకరాల విస్తీర్ణం భూమికి సంబంధించిన నూతన పట్టాదారు పాసుపుస్తకాల కోసం గత మూడు సంవత్సరాల నుంచి నిరీక్షిస్తున్నామని వాపోయారు.
భూప్రక్షాళన పేరుతో పట్టాదారు పాసు పుస్తకాల జారీలో జాప్యం కారణంగా.. రైతుబంధు, రైతుబీమా, ప్రధానమంత్రి కిసాన్ సమ్మాన్ యోజన, సంస్థాగత రుణాలు, పంట బీమా పరిహారం వంటివేమీ తాము నోచుకోవడం లేదని నారాయణపురం రైతులు ఆందోళన వ్యక్తం చేశారు.