గ్రేటర్ ఎన్నికల ఆసరాగా మతకల్లోలాలకు కుట్ర: డీజీపీ

జీహెచ్ఎంసీ ఎన్నికల నేపథ్యంలో హైదరాబాద్​లో శాంతిభద్రతల సమస్యల సృష్టించేందుకు కొంతమంది ప్రయత్నించే అవకాశం ఉందని డీజీపీ మహేందర్​ రెడ్డి అన్నారు. విధ్వంసక శక్తులు సామాజిక మాధ్యమాల్లో అసత్య ప్రచారాలు చేసి ప్రజల మనోభావాలు దెబ్బతీసి అల్లర్లు, మతకల్లోలాలు సృష్టించాలని చూస్తున్నట్లు సమాచారం ఉందని మహేందర్ రెడ్డి అన్నారు. పోలీస్ శాఖలోని అన్ని స్థాయిల్లోని అధికారులు సమన్వయంతో పనిచేస్తూ రాష్ట్రంలో, హైదరాబాద్ మహానగరంలో ఎలాంటి ఘర్షణలు తలెత్తకుండా చూస్తున్నామని డీజీపీ తెలిపారు.

తారస్థాయికి చేరుకున్న జీహెచ్ఎంసీ ఎన్నికల ప్రచారం సందర్భంగా కొన్ని చోట్ల ఘర్షణలు తలెత్తే అవకాశం ఉందని పోలీసు వర్గాలు అనుమానిస్తున్నాయి. ఇంటలిజెన్స్, ఎస్బీ నుంచి సేకరించిన సమాచారాన్ని బేరీజు వేసుకున్న పోలీస్ ఉన్నతాధికారులు... కొన్ని విధ్వంసక శక్తులు శాంతిభద్రతలకు విఘాతం కలిగించేలా ప్రవర్తించే ప్రమాదముందని అంచనా వేశారు. డీజీపీ కార్యాలయంలో డీజీపీ మహేందర్ రెడ్డి హైదరాబాద్, రాచకొండ, సైబరాబాద్ కమిషనర్లతో పాటు.. శాంతిభద్రతల అదనపు డీజీపీ, తూర్పు, పశ్చిమ ఐజీలతో సమీక్ష నిర్వహించారు. జీహెచ్ఎంసీ ఎన్నికల్లో బందోబస్తుపరంగా తీసుకుంటున్న చర్యల గురించి అంజనీ కుమార్, మహేశ్ భగవత్, సజ్జనార్ వివరించారు. ముఖ్యంగా రౌడీషీటర్లు, అల్లరి మూకలను బైండోవర్ చేసినట్లు సీపీలు డీజీపీకి తెలిపారు.

ప్రజాశ్రేయస్సు దృష్ట్యా బయటపెట్టలేం..

హైదరాబాద్ మహానగరంతో పాటు రాష్ట్రంలోని కొన్నిచోట్ల అల్లర్లు, మతఘర్షణలు సృష్టించేందుకు కొంతమంది ప్రయత్నిస్తున్నట్లు సమాచారం ఉందని.. దీన్ని ముందుగానే అరికట్టేందుకు సిద్ధంగా ఉండాలని డీజీపీ మహేందర్ రెడ్డి సీపీలను ఆదేశించారు. ఈ మేరకు పోలీసులు తీసుకుంటున్న ముందస్తు జాగ్రత్త చర్యలను మహేందర్ రెడ్డి వివరించారు. సామాజిక మాధ్యమాల్లో అసత్య ప్రచారం చేసి... ప్రజల మనోభావాలను దెబ్బతీసి అల్లర్లు సృష్టించేలా కొంతమంది కుట్ర పన్నుతున్నారన్నారు. దీనికి సంబంధించిన సమాచారం ఉన్నప్పటికీ... ప్రజాశ్రేయస్సు దృష్ట్యా బయటపెట్టలేమని.. మత ఘర్షణలను నిరోధించడానికి పోలీస్ శాఖ పూర్థిస్థాయిలో సన్నదమై ఉందని మహేందర్ రెడ్డి తెలిపారు.

భారీ బందోబస్తు

ఎన్నికల నిబంధనలు ఉల్లంఘించే వాళ్లపై కేసులు నమోదు చేస్తున్నామని.. రాజకీయ నాయకుల రెచ్చగొట్టే వ్యాఖ్యలు, విధ్వేషపూరిత ప్రసంగాలను నిశితంగా గమనిస్తున్నామని మహేందర్ రెడ్డి అన్నారు. ఆయా ప్రసంగాలపై న్యాయసలహా తీసుకొని ముందుకు వెళ్తామని మహేందర్ రెడ్డి తెలిపారు. ఎన్నికల నిబంధనలు ఉల్లంఘించిన 50మందిపై కేసు నమోదు చేశామని తెలిపారు. నగరంలో నివాసం ఉన్న రోహింగ్యాలలో నిబంధనలకు విరుద్ధంగా ఆధార్, రేషన్, ఓటరు గుర్తింపు కార్డు తీసుకున్న 62మందిపై కేసులు నమోదు చేశామని మహేందర్ రెడ్డి తెలిపారు. జీహెచ్ఎంసీ ఎన్నికల కోసం మూడు కమిషనరేట్ల పరిధిలో ఇప్పటికే బందోబస్తును ఏర్పాటు చేశామని... 51వేల 500మంది పోలీసులు విధుల్లో ఉంటారని మహేందర్ రెడ్డి తెలిపారు. 3500 మంది రౌడీషీటర్లను బైండోవర్ చేశామని.... శాంతిభద్రతలకు భంగం కలిగించాలని చూస్తే ఎంతటి వారినైనా చట్టపరిధిలో కఠినంగా శిక్షిస్తామని మహేందర్ రెడ్డి తెలిపారు.

నిర్భయంగా ఓటేయాలి..

ప్రజలు నిర్భయంగా తమ ఓటు హక్కును వినియోగించుకోవాలని మహేందర్ రెడ్డి సూచించారు. సామాజిక మాధ్యమాల్లో వస్తున్న అసత్య ప్రచారాలు కానీ, శాంతిభద్రతలకు విఘాతం కలిగే ఎలాంటి చర్యలు దృష్టికి వచ్చినా వెంటనే పోలీసుల దృష్టికి తీసుకొచ్చి సహకరించాలని డీజీపీ మహేందర్ రెడ్డి ప్రజలను కోరారు.

ఇవీ చూడండి: మతకల్లోలాలు సృష్టించే వారు ఎవరైనా వదలం: డీజీపీ