లాక్‌డౌన్‌ సమయంలో దిగంతిక కూడా అందరిలా ఇంట్లోనే ఉంది. కానీ ఖాళీగా కూర్చోలేదు. మాస్క్‌లు ధరించినా అవి పూర్తిస్థాయిలో వైరస్‌ని నిలువరించలేకపోవడం గమనించింది. వైరస్‌ని అంతం చేసే మాస్క్‌ల తయారీపై దృష్టి పెట్టింది. ఇందుకోసం తన గదినే ల్యాబ్‌గా మార్చుకుంది. వారం రోజుల పాటు పగలూరాత్రీ శ్రమించింది. ఆ శ్రమ ఫలితమే ‘ఎయిర్‌ ప్రొవైడర్‌ అండ్‌ వైరస్‌ డిస్ట్రాయర్‌ మాస్క్‌’. ఈ పరికరాన్ని ‘ది నేషనల్‌ ఇన్నోవేషన్‌ ఫౌండేషన్‌ ఇండియా’ నిర్వహించిన పోటీలో ప్రదర్శించి విజేతగా నిలిచింది.
ధర రూ.250
ఈ పరికరంలో... వైరస్‌ని అంతం చేసే రసాయన ఛాంబర్లు రెండు ఉంటాయి. దీన్ని ధరిస్తే, రోగి గొంతులోకి వెళ్లే వైరస్‌ను నాశనం చేసి.. తాజా ఆక్సిజన్‌ ఆ వ్యక్తి ఊపిరితిత్తుల్లోకి తీసుకెళ్తుంది. దీని ఖరీదు రూ.250. దీని తయారీకి కేంద్ర ప్రభుత్వం అనుమతినిచ్చింది. అలాగే ‘వైరస్‌ డిస్ట్రాయర్‌ వాటర్‌ గన్‌’ అనే మరో పరికరాన్ని కూడా తయారుచేసిందీ అమ్మాయి. విద్యుత్తుతో పనిచేస్తుందీ పరికరం. ఈ గన్‌ను వైరస్‌ ఉండే ప్రాంతాల్లో వినియోగించొచ్చు దీన్ని కూడా నేషనల్‌ ఇన్నోవేషన్‌ ఇండియా నిర్వహించిన పోటీలో ప్రదర్శించి శెభాష్‌ అనిపించుకుంది.