హైదరాబాద్‌లోని ఆసుపత్రుల్లో చేసిన అధ్యయనం ప్రకారం.. కొవిడ్ పాజిటివ్‌ వ్యక్తుల నుంచి రెండు మీటర్ల దూరం వరకు వైరస్‌ సూక్ష్మ కణాలు వ్యాపించి రెండు గంటల కంటే ఎక్కువే గాలిలో ఉంటున్నాయని అటల్‌ ఇంక్యుబేషన్‌ (ఏఐసీ) కేంద్రం సీఈవో డాక్టర్‌ మధుసూదన్‌రావు తెలిపారు. కొవిడ్ పాజిటివ్‌ వ్యక్తులు.. ఒక గదిలో ఎంతసేపు గడిపారనే దానిపై వ్యాప్తి ఆధారపడి ఉందన్నారు.
- కొవిడ్ వార్డుల్లో పాజిటివ్‌ వ్యక్తులు రెండు గంటల కంటే ఎక్కువ సమయం ఉన్నప్పుడు, వారు కూర్చున్న ప్రదేశం నుంచి 2 మీటర్ల కంటే ఎక్కువ దూరం వైరస్‌ వ్యాప్తి గాలిలో ఉన్నట్లు తేలింది.
- గాలిలో కరోనా వైరస్‌ వ్యాపిస్తున్నా మాస్క్‌, భౌతిక దూరంతో కొవిడ్ బారిన పడకుండా జాగ్రత్తపడొచ్చు. టీకాలు వేయించుకోవాలి.
- కుటుంబంలో పాజిటివ్‌ వచ్చిన వ్యక్తిని త్వరగా గుర్తించి విడిగా ఉంచగలిగితే మంచిది. గదుల లోపల గాలి ద్వారా వ్యాప్తి ఎక్కువగా ఉంది.
- రెండో ఉద్ధృతిలో వ్యాప్తి వేగంగా ఉండటానికి కొత్తరకం వైరస్సే కారణం అనడానికి ఏ ఆధారాలు లేవు. యూకే, ఆఫ్రికా రకం వైరస్‌ కలిసి వ్యాపిస్తున్న డబుల్‌ మ్యూటెంటే కారణమని చెప్పలేం. కొన్ని కేసుల ఆధారంగా ఒక నిర్ణయానికి రాలేం.
- మొదటి వేవ్‌లోనూ పిల్లలకు వైరస్‌ సోకింది. ఈసారి మరింత ఎక్కువగా కొవిడ్ బారిన పడుతున్నారు.