రాత్రిపూట నగరంలో అన్నీ బంద్

కరోనా కట్టడి చర్యలతో హైదరాబాద్​లో అందరూ ఇళ్లకే పరిమితవుతున్నారు. నగరంలోని రహదారులు వెలవెలబోతున్నాయి. ఎవరైనా బయటకు వస్తే పోలీసులు తనిఖీ చేసి పంపిస్తున్నారు.

లాక్​డౌన్​ నేపథ్యంలో నగరంలో ప్రధాన రహదారులన్నీ బోసిపోతున్నాయి. కరోనా కట్టడికి రాష్ట్ర ప్రభుత్వం సాయంత్రం 7 గంటల నుంచి ఉదయం 6 గంటల వరకు బంద్​ పాటించాలని ఆదేశించింది. నగరంలోని అన్ని దుకాణాలతో పాటు పెట్రోల్​ బంక్​లు కూడా పూర్తి మూసివేశారు.

నగరంలో రహదారులపై ప్రత్యేక చెక్​పోస్టులు పెట్టి పోలీసులు తనిఖీలు చేస్తున్నారు. అనవసరంగా ఎవరూ బయట తిరగకుండా కట్టుదిట్టమైన చర్యలు తీసుకుంటున్నారు. ఎవరైనా బయటకు వస్తే పూర్తి వివరాలు తెలుసుకొని, అవసరమా లేదా అని నిర్ధరించిన తర్వాతనే వారిని పంపిస్తున్నారు.