రాష్ట్రంలో భారీ వర్షాలకు వాగులు ఉప్పొంగుతున్నాయి. చెరువుల మత్తడి కింద ఉన్న మార్గాల్లో ఒక్కసారిగా ప్రవాహం పెరుగుతోంది. రాష్ట్రవ్యాప్తంగా వేల సంఖ్యలో లో లెవెల్‌ వంతెనలున్నాయి. వాటి వద్ద అప్రమత్తం చేసే బోర్డులు లేవు. వరుస ప్రమాదాల నేపథ్యంలో అనేక లోపాలు వెలుగుచూశాయి.
రంగారెడ్డి జిల్లా శంకర్‌పల్లి మండలం కొత్తపల్లి వాగుపై ఈ వంతెన ప్రమాదకరంగా ఉంది. ఆదివారం వరదకు కారు కొట్టుకుపోయిన సంఘటనలో దివ్యాంగుడు ప్రాణాలు కోల్పోయారు. రెండేళ్ల కిందట కూడా ఒకరు నీటిలో కొట్టుకుపోయారు. ఇక్కడ కూడా రక్షణ గోడలు, ప్రమాద సూచికలు లేవు. దగ్గరికి వచ్చేవరకు అక్కడ వంతెన ఉందని తెలిపే బోర్డు కూడా లేదు.
వంతెనలపై ప్రమాదవశాత్తు జారిపోతే నిలదొక్కుకునేందుకు ఊతమేదీ ఉండదు. ప్రధాన వంతెనల వద్ద మాత్రమే రక్షణ గోడలు, పిల్లర్లు కనిపిస్తున్నాయి. వాటి నిర్వహణ కూడా అంతంతమాత్రమే. దిగువ వంతెనల నిర్వహణ దిగదుడుపుగా మారింది. రాష్ట్రవ్యాప్తంగా ఆర్‌ అండ్ బీ, పంచాయతీరాజ్‌ శాఖల పరిధిలోని రహదారుల్లో ఇలాంటి వంతెనలు ఉన్నాయి. చప్టాలు, కల్వర్టులు కూడా ప్రమాదకర స్థితిలో కనిపిస్తున్నాయి. పాత వంతెనల నిర్వహణను పట్టించుకోకపోవడంతో ప్రమాదాలకు అడ్డాలుగా మారుతున్నాయి. రాజన్న సిరిసిల్ల జిల్లా గంభీరావుపేట మండలంలో మానేరుపై ఉన్న లో లెవెల్‌ వంతెనపైనా నీటిమట్టాన్ని తెలిపే సూచికలు లేవు. ఇరువైపులా రక్షణ నిర్మాణాలు లేవు. ఇక్కడ సోమవారం బస్సు వంతెన చివరికి జారి నిలిచిపోయిన విషయం తెలిసిందే.
యాదాద్రి జిల్లా రాజుపేట మండలం కుర్రారం వాగుపై ఉన్న లోలెవెల్‌ వంతెన ఇది. ఇక్కడ సోమవారం ఇద్దరు యువతులు నీటిలో కొట్టుకుపోయారు. ప్రవాహాన్ని అంచనా వేయలేక ద్విచక్ర వాహనంపై వెళ్లడంతో ప్రమాదం సంభవించింది. ఇదే మార్గంలో పారుపల్లి వద్ద కూడా ఇలాంటి వంతెన ఉంది. వీటి వద్ద ఎక్కడా సూచికలు లేవు.
చెరువుల కింద ప్రమాదకర స్థితి
చెరువుల దిగువన ఉన్న రహదారుల్లోనే ఎక్కువ ప్రమాదాలు జరుగుతున్నాయి. వరదనీటితో మత్తడి ఒక్కసారిగా పెరగడంతో వాహనదారులు, పాదచారులు కొట్టుకుపోతున్నారు. రెండు నెలల కిందట నర్సంపేట శివారులో చెరువు మత్తడి ధాటికి ఓ వ్యక్తి కొట్టుకుపోయి మృతి చెందాడు.