కేంద్రం షాకింగ్​ డెసిషన్ - UPI చెల్లింపులపై కీలక నిర్ణయం!

Time Limit for First UPI Transaction: ఆన్‌లైన్‌ మోసాలు భారీగా పెరిగిపోతున్న క్రమంలో.. UPI చెల్లింపులపై కేంద్ర ప్రభుత్వం కీలక నిర్ణయం తీసుకోబోతున్నట్టు సమాచారం. మరి, అదేంటి? ప్రజలపై ఎలాంటి ప్రభావం చూపనుంది? అనే వివరాలు ఇప్పుడు తెలుసుకుందాం.

Time Limit for First UPI Transaction :ఇప్పుడు దేశంలోడిజిటల్​ ట్రాన్సాక్షన్స్ హవా నడుస్తోంది. దీంతో.. సైబర్​ నేరస్థులు కూడా టెక్నాలజీని అందిపుచ్చుకుని మోసాలకు పాల్పడుతున్నారు. నిత్యం వందలాది మంది ఈ కేటుగాళ్ల చేతిలో మోసపోతున్నారు. బ్యాంకులు, కస్టమర్లు ఎన్ని జాగ్రత్తలు తీసుకున్నా.. ఎప్పటికప్పుడు కొత్త పద్ధతులు ఎంచుకొని లూటీ చేస్తున్నారు. ఈ నేపథ్యంలో.. బ్యాంకింగ్ మోసాలను అరికట్టేందుకు కేంద్ర ప్రభుత్వం కొత్త వ్యూహాలను సిద్ధం చేస్తున్నట్లు సమాచారం. ఆ వివరాలను ఈ స్టోరీలో తెలుసుకుందాం.

ట్రాన్సాక్షన్​ రద్దు చేసుకునే వెసులుబాటు: ఇద్దరు వ్యక్తుల మధ్య జరిగే మొదటి ట్రాన్సాక్షన్​ కంప్లీట్ కావడానికి.. నిర్దిష్ట సమయం పట్టేలా చూడాలని కేంద్రం భావిస్తున్నట్టు సమాచారం. అంటే.. ప్రస్తుతం ఎవరికైనా డబ్బు పంపించాలంటే.. UPI ద్వారా క్షణాల్లో పంపొచ్చు. తొలిసారిగా పంపుతున్న వారికి కూడా ఇదే పద్ధతి అమల్లో ఉంది. అయితే.. ఇకపై ఈ పద్ధతి మార్చాలని చూస్తున్నట్టు సమాచారం. మొదటిసారి పంపే డబ్బు.. అవతలి వ్యక్తికి చేరడానికి చాలా సమయం పట్టేలా చూడాలని భావిస్తోందట! దీనివల్ల.. పొరపాటు ట్రాన్సాక్షన్ జరిగినా.. ఏదైనా మోసం జరిగినా.. ఆ డబ్బును అవతలి వ్యక్తి ఖాతాకు చేరకుండా ఆపొచ్చన్నది ఉద్దేశంగా చెబుతున్నారు. ఇలాంటి ట్రాన్సాక్షన్‌ను రద్దు చేసుకునే వెసులుబాటు కూడా ఉండేలా చూడబోతున్నట్టు సమాచారం.

కాస్త ఆలస్యమైనా..

ఈ కొత్త విధానం వల్ల డిజిటల్‌ లావాదేవీ (Digital Payments)ల విషయంలో కొంత జాప్యం జరిగే అవకాశం ఉంది. అయినప్పటికీ.. సైబర్‌ మోసాలను అరికట్టేందుకు ఈ చర్య తప్పదనే యోచనలో కేంద్ర ప్రభుత్వం ఉన్నట్లు తెలుస్తోంది. ఇందులో భాగంగా.. ఇద్దరు వ్యక్తుల మధ్య ఫస్ట్ ట్రాన్సాక్షన్​ కంప్లీట్ కావడానికి దాదాపు 4 గంటల సమయం ఉండాలని చూస్తున్నట్టు సమాచారం. అయితే.. చిన్న మొత్తాలకు కాకుండా.. రూ.2 వేలు దాటే చెల్లింపులకు మాత్రమే ఈ 4 గంటల నిబంధన వర్తింపజేయనున్నట్లు తెలుస్తోంది.

ఇప్పటికే అమల్లో కొన్ని రూల్స్..

ఇప్పటికే కొన్ని నిబంధనలు అమల్లో ఉన్నాయి. కొత్తగా యూపీఐ అకౌంట్​ తెరిచినప్పుడు తొలి 24 గంటల్లో కేవలం 5వేల రూపాయలు మాత్రమే ట్రాన్స్​ఫర్ చేయగలరు. అలాగే.. నెఫ్ట్‌లో తొలి 24 గంటల్లో 50 వేల రూపాయలను మాత్రమే పంపగలం. ఈ క్రమంలో ప్రభుత్వ తాజా ఆలోచన ప్రకారం.. గత చరిత్రతో సంబంధం లేకుండా.. ఇద్దరు వ్యక్తుల మధ్య జరిగే మొదటి లావాదేవీలన్నింటికీ.. (రూ.2,000 దాటితే మాత్రమే) నాలుగు గంటల వ్యవధి నిబంధనను వర్తింపజేయనున్నట్లు తెలుస్తోంది. మరి, ఈ నిబంధన ఎప్పటి నుంచి అమల్లోకి వస్తుందన్నది చూడాలి.