Stock Market Close: దేశీయ స్టాక్ మార్కెట్లు వరుసగా రెండో సెషన్లో లాభాలు నమోదుచేశాయి. బొంబాయి స్టాక్ ఎక్స్చేంజి సూచీ సెన్సెక్స్ 350 పాయింట్లు పెరిగి 57 వేల 944 వద్ద స్థిరపడింది. జాతీయ స్టాక్ ఎక్స్చేంజి సూచీ నిఫ్టీ 103 పాయింట్ల లాభంతో 17 వేల 325 వద్ద సెషన్ను ముగించింది. మంగళవారం సెషన్లో సూచీలు మొత్తం లాభాల్లోనే కదలాడాయి. తొలుత సెన్సెక్స్ దాదాపు 220 పాయింట్ల లాభంతో ప్రారంభమైంది. ఆ తర్వాత కాస్త ఒడుదొడుకులకు లోనైనా సానుకూలంగానే ట్రేడయింది. ఓ దశలో దాదాపు 400 పాయింట్లకుపైగా పెరిగి 58,002 వద్ద గరిష్ఠాన్ని నమోదుచేసింది. 57 వేల 639 వద్ద కనిష్ఠాన్ని తాకింది.
లాభనష్టాల్లో:ఫార్మా, రియాల్టీ రంగం సహా హెవీ వెయిట్ షేర్ల ఊతంతో.. మార్కెట్లు లాభాల దిశగా పయనించాయి. వీటిల్లో కొనుగోళ్లు కనిపించాయి. ప్రభుత్వ రంగ బ్యాంకింగ్ సహా ఆయిల్ అండ్ గ్యాస్ షేర్లలో అమ్మకాల ఒత్తిడి కనిపించింది. అంతర్జాతీయంగా ముడిచమురు ధరలు తగ్గడం.. మదుపరుల సెంటిమెంట్ను బలపర్చింది. ఐషర్ మోటార్స్, అదానీ పోర్ట్స్, జేఎస్డబ్ల్యూ స్టీల్, దివిస్ ల్యాబ్స్, భారతీ ఎయిర్టెల్ రాణించాయి. హీరో మోటోకార్ప్, ఓఎన్జీసీ, కోల్ ఇండియా, ఐఓసీ, ఐటీసీ నష్టపోయాయి. 1307 షేర్లు ముందుకు దూసుకెళ్లాయి. 1917 షేర్లు పడిపోయాయి. 89 షేర్లలో ఎలాంటి మార్పు లేదు.