Jack Dorsey On Indian Government : సాగు చట్టాలపై ఆందోళనల జరిగిన సమయంలో భారత ప్రభుత్వం నుంచి తమకు ఒత్తిడి ఎదురైందంటూ ట్విట్టర్ మాజీ సీఈఓ జాక్ డోర్సే చేసిన ఆరోపణలను కేంద్ర ప్రభుత్వం తీవ్రంగా ఖండించింది. డోర్సే చెబుతున్న విషయాలు పచ్చి అబద్ధాలని కేంద్ర సమాచార సాంకేతిక శాఖ మంత్రి రాజీవ్‌ చంద్రశేఖర్‌ కొట్టిపారేశారు. ట్విట్టర్ చరిత్ర నుంచి చాలా సందేహాస్పద కాలాన్ని తొలగించే ప్రయత్నంలో భాగంగానే ఆయన ఈ వ్యాఖ్యలు చేసి ఉంటారని రాజీవ్‌ ట్వీట్ చేశారు. భారత సార్వభౌమాధికారాన్ని అంగీకరించలేకే ఇలాంటి ఆరోపణలు చేస్తున్నారని మండిపడ్డారు.
జాక్ డోర్సే ఏమన్నారంటే?
ఓ టీవీ ఛానెల్కు ఇచ్చిన ఇంటర్వ్యూలో భారత ప్రభుత్వంపై తీవ్ర ఆరోపణలు చేశారు ట్విట్టర్ మాజీ సీఈఓ జాక్ డోర్సే. ఏ ప్రభుత్వం నుంచైనా మీకు ఒత్తిళ్లు ఎదురయ్యాయా అని వ్యాఖ్యాత అడిగిన ప్రశ్నకు సమాధానమిస్తూ.. ఆయన భారత్‌ను ఉదహరణగా చెప్పారు. భారత్లో సాగు చట్టాలపై రైతు ఆందోళనలు జరుగుతున్న క్రమంలో మోదీ సర్కారు నుంచి తీవ్ర ఒత్తిడి ఎదుర్కొన్నామని వెల్లడించారు. రైతులు, జర్నలిస్టుల అకౌంట్ల కంటెంట్ను తొలగించాలంటూ అనేక అభ్యంతరాలు పెట్టారని వివరించారు. ఒక దశలో ట్విట్టర్‌ను భారత్లో మూసేస్తామని కూడా బెదిరించినట్లు ఆయన ఆరోపించారు. అలాగే ట్విట్టర్ ఉద్యోగుల ఇళ్లలో తనిఖీలు చేస్తామని కూడా అన్నారని చెప్పుకొచ్చారు. అయితే, ఇలాంటి బెదిరింపులు ఎవరి నుంచి వచ్చాయనే దానిపై మాత్రం డోర్సే ఎలాంటి ఆధారాలను బయటపెట్టలేదు.
Rajeev Chandrasekhar Twitter : ఈ నేపథ్యంలో జాక్ డోర్సే ఆరోపణలను రాజీవ్‌ చంద్రశేఖర్‌ తీవ్రంగా ఖండించారు. డోర్సే ఆరోపణల్లో ఏమాత్రం వాస్తవం లేదని చెప్పారు. ఆయన హయాంలో ట్విట్టర్.. భారత చట్టాలను అనేకసార్లు ఉల్లంఘించిందని స్పష్టం చేశారు. 2020- 2022 మధ్య పదే పదే నిబంధనలను అతిక్రమించారని వెల్లడించారు. జూన్‌ 2022 తర్వాతే ట్విట్టర్ భారత నిబంధనలకు అనుగుణంగా నడుచుకోవడం ప్రారంభించిందని చెప్పారు. డోర్సే ఆరోపించినట్లుగా ఎవరిపైనా తనిఖీలు చేయలేదని.. ట్విట్టర్‌ను మూసివేయనూ లేదని స్పష్టం చేశారు. భారత సార్వభౌమత్వాన్ని అంగీకరించడానికి డోర్సే హయాంలోని ట్విట్టర్ విముఖత వ్యక్తం చేసిందని తెలిపారు.
"దేశీయంగా కార్యకలాపాలు నిర్వహిస్తున్న సంస్థలన్నీ ఇక్కడి చట్టాలను అమలు చేసేలా చూసే హక్కు ఓ సార్వభౌమ దేశంగా భారత్‌కు ఉంది. 2021 జనవరిలో జరిగిన రైతుల ఆందోళన సమయంలో అనేక దుష్ప్రచారాలు చక్కర్లు కొట్టాయి. వాటిలో నరమేధంలాంటి తీవ్రమైన అసత్య ప్రచారాలు కూడా ఉన్నాయి. అలాంటి తప్పుడు సమాచారం వ్యాప్తి చెందకుండా భారత ప్రభుత్వం బాధ్యత తీసుకొంది. లేదంటే పరిస్థితులు మరింత దిగజారి ఉద్రిక్తతలు పెరిగే అవకాశాలు ఉండేవి. ఇలాంటి ఘటనలే అమెరికాలో జరిగినప్పుడు మాత్రం తప్పుడు సమాచారాన్ని ట్విట్టర్ వెంటనే తొలగించింది. కానీ, భారత్‌కు వచ్చే సరికి మాత్రం వారికి ఇబ్బందులు ఎదురయ్యాయి. డోర్సే హయాంలో ట్విట్టర్ అనుసరించిన పక్షపాత వైఖరికి ఇది నిదర్శనం. ట్విట్టర్ ఉద్యోగుల ఇళ్లపై తనిఖీలు జరగలేదు. ఎవరినీ జైలుకు కూడా పంపలేదు."
--రాజీవ్‌ చంద్రశేఖర్‌, కేంద్ర సమాచార సాంకేతిక శాఖ మంత్రి