ఆర్థిక మందగమనంతో రైల్వే వ్యవస్థ కుదేలు..!

గతేడాదితో పోలిస్తే  రెండో త్రైమాసికంలో రైల్వే ప్రయాణం, సరుకు రవాణా ఛార్జీలో రూ.155 కోట్లు, 3,901 కోట్ల మేర నష్టం వాటిల్లినట్లు అధికారులు తెలిపారు. దేశంలో ఆర్థిక మందగమనమే ఈ నష్టాలకు కారణమని అధికారులు వెల్లడించారు.

దేశంలో నెలకొన్న ఆర్థిక మాంద్యం.. భారతీయ రైల్వేపై కూడా ప్రభావం చూపించింది. 2019-20 రెండో త్రైమాసికంలో రైల్వే ఆదాయంలో కోత పడింది. తొలి త్రైమాసికంతో పోలిస్తే ప్యాసింజర్‌ రైళ్లలో 155 కోట్ల రూపాయల తక్కువ ఆదాయం రాగా... సరుకు రవాణా రైళ్ల ఆదాయంలో 3 వేల 9 వందల కోట్ల రూపాయల కోత పడింది. సమాచార హక్కు చట్టం కింద దాఖలైన ఓ విజ్ఞప్తికి సమాధానమిస్తూ.. సమాచార కమిషన్‌ ఈ వివరాలు వెల్లడించింది.

తగ్గిన ప్రయాణ ఆదాయం

2019-20 మొదటి త్రైమాసికంలో (ఏప్రిల్​- జూన్​) ప్రయాణ ఛార్జీల ద్వారా రూ.13,398.92 కోట్లు ఆర్జించినట్లు అధికారులు తెలిపారు. రెండో త్రైమాసికంలో 13,243.81 కోట్లకు పడిపోయినట్లు వెల్లడించారు. గత ఏడాదితో పోలిస్తే 2019 ఏప్రిల్​ నుంచి సెప్టెంబర్ వరకు 1.27 శాతం తగ్గినట్లు పేర్కొన్నారు అధికారులు.​

సరుకు రవాణాలో ...

అదే సమయంలో రైల్వేకు సరుకు రవాణా ద్వారా మొదటి త్రైమాసికంలో రూ. 29,066.92 కోట్లు వచ్చినట్లు ప్రకటించారు. రెండో త్రైమాసికంలో రూ. 25,165.13 కోట్లకు పడిపోయినట్లు పేర్కొన్నారు. గత ఏడాదితో పోలిస్తే రవాణాలో 1.13 శాతం తగ్గినట్లు వెల్లడించారు అధికారులు.

దిద్దుబాటు చర్యలు...

ఆర్థిక మాంద్యం ప్రభావం... టికెట్ల బుకింగ్‌ పైనా పడింది. అయితే మాంద్యం ప్రభావం నుంచి బయటపడడానికి ఉద్దీపన చర్యలు తీసుకుంటున్నట్లు...... రైల్వే శాఖ తెలిపింది. రద్దీ సమయాల్లో విధించే సర్‌ఛార్జ్‌ రద్దుతో సహా, AC రైళ్లలో ప్రయాణించే వారికి ఛార్జీలో 25 శాతం మినహాయిస్తున్నట్లు పేర్కొంది.

ఇదీ చూడండి:5 లక్షల దీపకాంతులతో అయోధ్య గిన్నీస్​ రికార్డు