ప్రభుత్వానికి ఆర్బీఐ నిధులపై నేటి నుంచి భేటీ

ఆర్బీఐ వద్దనున్న మిగులు మూలధన నిల్వలను ప్రభుత్వానికి బదిలీ చేయటంపై గవర్నర్​ శక్తికాంత దాస్​, బ్యాంకులు, సంస్థలతో ఆర్థిక సంఘం రెండు రోజుల భేటీ నేడు ప్రారంభంకానుంది.

ఆర్బీఐ వద్దనున్న మిగులు మూలధన నిల్వలు ప్రభుత్వానికి ఇవ్వటంపై కీలక భేటీ నేడు ప్రారంభంకానుంది. ఈ విషయంపై చర్చించటానికి గవర్నర్​ శక్తి కాంత దాస్​, వివిధ బ్యాంకులు, సంస్థలతో ఆర్థిక సంఘం ముంబయిలో రెండు రోజుల సమావేశం కానుంది.

ఆర్థిక సంఘం ఛైర్మన్​ ఎన్​.కే. సింగ్ నేతృత్వంలో జరగనున్న ఈ భేటీలో... మిగులు మూలధనాన్ని ఎలాంటి పరిస్థితుల్లో కేంద్రానికి బదిలీ చేయొచ్చో చర్చించనున్నట్లు ప్రకటించారు.

15వ ఆర్థిక సంఘం కాలవ్యవధిలో ప్రభుత్వానికి ఆర్బీఐ నుంచి అందాల్సిన డివిడెండ్​, మిగులుపై కూడా చర్చ జరగనుంది. బ్యాంకులకు మూలధనాన్ని అందించటం, దానివల్ల ప్రభుత్వం తీసుకునే రుణాల వ్యయంపై పడే ప్రభావం, స్థూల ఆర్థిక వ్యవస్థ అంచనాలు లాంటి ఇతర అంశాలు చర్చకు రానున్నాయి.