దేశ రాజధాని దిల్లీలో ఉల్లి, టమాటా ధరలు మళ్లీ మండిపోతున్నాయి. ధరల నియంత్రణకు ప్రభుత్వం చర్యలు తీసుకున్నప్పటికీ.. దిల్లీలో ఉల్లి, టమాటా కిలోకు రూ.60 నుంచి 70 వరకు పలుకుతోంది. ప్రాంతం, నాణ్యతల ఆధారంగా ధరల్లో వ్యత్యాసం ఉంటోంది.
వినియోగదారు వ్యవహారాల మంత్రిత్వ శాఖ గణాంకాల ప్రకారం.. జాతీయ రాజధాని ప్రాంతంలో కిలో ఉల్లి రూ.55గా ఉండగా.. టమాటా కిలో రూ.53 వద్ద ఉన్నట్లు తెలిసింది.
ధరల నియంత్రణ కోసం ప్రభుత్వం గత నెల.. సరఫరా పెంచడం వంటి చర్యలు తీసుకుంది. అయినప్పటికీ ధరలు ఇంకా అధికంగానే కొనసాగుతుండటం గమనార్హం. ఉల్లి, టమాటాను అధికంగా పండించే మహారాష్ట్ర, కర్ణాటకల్లో ఇటీవల కురిసిన భారీ వర్షాల కారణంగా.. సరఫరా తగ్గి ధరలు పెరిగినట్లు తెలుస్తోంది.