ఏదైనా ఉద్యోగం చేస్తూ ఆదాయ పన్ను రిటర్నుకు దరఖాస్తు చేస్తున్నారా? అయితే ఈ సమాచారం కచ్చితంగా తెలుసుకోవాల్సిందే.
ఆదాయ పన్ను రిటర్నులో సమర్పించే 'ఫారం 16'లో కీలక మార్పులు చేసింది కేంద్ర ప్రత్యక్ష పన్నుల బోర్డు (సీబీడీటీ). మే 12 నుంచి 'ఫారం-16'లో కొత్త నిబంధనలు అమలులోకి రానున్నాయి.
2018-19 ఆర్థిక సంవత్సరం సహా ప్రస్తుత ఆర్థిక సంవత్సరానికి ఈ నూతన ఫారంనే ఉపయోగించాలని సీబీడీటీ స్పష్టం చేసింది.
'ఫారం-16' అంటే?
ఉద్యోగుల వేతనం నుంచి ప్రతి నెల యాజమాన్యం విధిస్తున్న కోతకు సంబంధించిన ధ్రువపత్రమే ఈ 'ఫారం-16'. ఇందులో ఆదాయ పన్ను శాఖకు సంస్థ యాజమాన్యం చెల్లిస్తున్న పన్ను వివరాలు ఉంటాయి.
అందుకే ఆదాయ పన్ను రిటర్ను సమయంలో 'ఫారం-16' చాలా ముఖ్యం. 'ఆదాయ పన్ను చట్టం-1961' ప్రకారం యాజమాన్యం తమ ఉద్యోగులకు 'ఫారం 16'ను జారీ చేయడం తప్పనిసరి.
బ్రేకప్ ఆఫ్ 'ఫారం 16'
'ఫారం-16' ని పార్ట్- ఏ, పార్ట్- బి గా విభజించారు. 'పార్ట్- ఏ'లో ఉద్యోగి పేరు, చిరునామా, పన్ను చెల్లింపుదారు పాన్ కార్డు వివరాలు, సంస్థ పాన్ వివరాలు, ఆదాయ పన్ను శాఖ వద్ద నమోదైన టీడీఎస్ వివరాలు ఉంటాయి.
'పార్ట్- బి' పార్ట్-ఏ కు కొనసాగింపు. ఇందులో ఉద్యోగి జీతభత్యాల వివరాలు, అలవెన్సులు, 1961 ఐటీ చట్టంలోని సెక్షన్ 80 ప్రకారం పలు రకాల డిడక్షన్లను తెలపాల్సి ఉంటుంది.
ఫారం 16 మార్పులు పన్ను మినహాయింపు వివరాలు
ఇంతకు ముందు 'ఫారం-16'లో పన్ను మినహాయింపు వివరాలు సమర్పిస్తే సరిపోయేది. కానీ సీబీడీటీ చేసిన నుతన మార్పులతో 'సెక్షన్ 10'లోని పలు సబ్ సెక్షన్ల కింద పన్ను మినహాయింపు వర్తించే ఆదాయం పూర్తి వివరాలు 'ఫారం 16' పార్ట్- బిలో పొందుపరచాల్సి ఉంటుంది.
ఇందుకు సంబంధించి కచ్చితమైన ప్రమాణాలను తీసుకువచ్చింది సీబీడీటీ. దీని ప్రకారం ట్రావెల్ అలవెన్సులు, రిటైర్ మెంట్ గ్రాట్యుటీ, పెన్షన్, ఇంటి అద్దె, ఇతర మార్గాల నుంచి ఎంత ఆదాయం వస్తుందనే వివరాలు పూర్తిగా పేర్కొనాల్సి ఉంటుంది.
పెట్టుబడుల ద్వారా..
పన్ను చెల్లింపుదారులు కొన్ని రకాల పెట్టుబడులు, ఇతరత్ర మార్గాల ద్వారా 'సెక్షన్-80'లోని '80 సీ నుంచి 80 యూ' వరకు పన్ను మినహాయింపులు పొందొచ్చు.
ఇప్పటి వరకూ పెట్టుబడుల మొత్తం వివరాలు తెలిపితే సరిపోయేది. సీబీడీటీ చేసిన తాజా మార్పులతో జీవిత బీమా, ఆరోగ్య బీమా, పెన్షన్ పథకాలు, ఉన్నత చదువులకోసం వడ్డీకి తీసుకున్న రుణం, సేవింగ్స్ అకౌంట్పై పొందుతున్న ఆదాయం, ఇతర మార్గాల ద్వారా వస్తున్న ఆదాయం పూర్తి వివరాలను సమర్పించాల్సి ఉంటుంది.
ఇతర మార్పులు
ప్రామాణిక కోత (స్టాండర్డ్ డిడక్షన్)కు సంబంధించి ప్రత్యేక సెక్షన్ను 'ఫారం-16'లో పొందుపరిచారు. 'టీడీఎస్' వర్తిస్తూ ఇతర మార్గాల ద్వారా వచ్చే ఆదాయ వివరాలు ఇందులో పొందుపరచాల్సి ఉంటుంది. మునుపటి సంస్థ నుంచి పొందిన జీతభత్యాలకు సంబంధించిన పూర్తి వివరాలు కూడా తెలియజేయొచ్చు.
