పత్తి ఉత్పత్తి, ఎగుమతుల్లో తగ్గుదల

దేశంలో పత్తి ఉత్పత్తితో పాటు ఎగుమతులు కూడా పడిపోతున్నాయి. నీటి కొరతే దీనికి కారణంగా ఉంది. ఫలితంగా... మూడు, నాలుగో సారి పత్తిని సేకరించకుండానే రైతులు మొక్కలను తొలగించారు.

పత్తి అనేది దేశవ్యాప్తంగానే కాకుండా ప్రపంచం మొత్తం మీద ప్రధానమైన పంటగా ఉంది. అలాంటి పంట ఉత్పత్తి, ఎగుమతులు భారత్​లో పడిపోతున్నాయి. నీటి ఎద్దడి వల్ల 70 నుంచి 80 శాతం ప్రాంతాల్లో మూడు, నాలుగో సారి పత్తిని సేకరించకుండానే రైతులు మొక్కలను తొలగించారు.

గుజరాత్​, మహారాష్ట్ర, తమిళనాడు, తెలంగాణ, కర్ణాటక, ఒడిశా, ఆంధ్రప్రదేశ్​లు పత్తిని పండించే రాష్ట్రాల్లో ప్రధానమైనవి. ఒడిశా, తమిళనాడు కాకుండా మిగతా అన్ని రాష్ట్రాల్లో ఉత్పత్తి అంచనాను తగ్గించింది కాటన్​ అసోసియేషన్​ ఆఫ్​ ఇండియా(సీఏఐ).

ప్రస్తుత సంవత్సరానికి సంబంధించి గుజరాత్​లో 1 లక్ష బేల్స్​, మహారాష్ట్రలో 80వేల బేల్స్​, తెలంగాణలో 4లక్షల బేల్స్​, ఆంధ్రప్రదేశ్​లో 1లక్ష బేల్స్​, కర్ణాటకలో 75వేల బేల్స్​ల ఉత్పత్తి తగ్గిపోనున్నట్లు అంచనా వేసింది సీఏఐ.

ఇదీ సంగతి...

2018-19లో పత్తి ఉత్పత్తి 31.88 శాతం తగ్గి 47 లక్షల బేల్స్​గా నమోదైంది. ఇది క్రితం ఏడాదిలో 69లక్షల బేల్స్​గా ఉంది. అల్ప ఉత్పత్తి, రూపాయి విలువ హెచ్చుతగ్గులకు లోనవటం ఎగుమతులను ప్రతికూలంగా ప్రభావితం చేస్తున్నాయి.

భారత్​లో పండించే పత్తికి అంతర్జాతీయంగా మంచి డిమాండ్​ ఉంది. అయితే పత్తి ధరలు ఆ మార్కెట్లతో పోటీ పడే స్థాయిలో లేవు. దేశీయంగా ఉత్పత్తి కూడా ఎప్పుడూ ఒకేలా ఉండటం లేదు.

వివిధ దేశాల్లో...

పత్తి ఎగుమతుల్లో బ్రెజిల్​, వియత్నాం, పాకిస్థాన్​, ఇండోనేసియా లాంటి దేశాలతో భారత్​ పోటీ పడుతోంది. అంతర్జాతీయంగా మన దేశ పత్తి.. మిగతా దేశాలతో పోటీ పడలేకపోతుందని, దాని వల్ల బ్రెజిల్​ మన మార్కెట్​ను కొల్లగొడుతోందని కాటన్​ కార్పొరేషన్​ ఆఫ్​ ఇండియా తెలిపింది.

అమెరికా, చైనా వాణిజ్య యుద్ధం వల్ల చైనాకు బ్రెజిల్​ నుంచి పత్తి ఎగుమతులు పెరిగే అవకాశం ఉన్నట్లు అమెరికా వ్యవసాయ విభాగం తెలిపింది.

వ్యవసాయం తరువాత ఎక్కువ మందికి ఉపాధి కల్పిస్తున్నది టెక్స్​టైల్​ రంగమే. వీటన్నింటి దృష్ట్యా ప్రభుత్వం చర్యలు తీసుకోవాలని కాటన్​ టెక్స్​టైల్​ ప్రమోషన్​ కౌన్సిల్​ కోరుతోంది.

ఇదీ చూడండి: లాభాల ప్రోత్సాహం... వడ్డీ రేట్లు తగ్గింపు