మారటోరియం సమయంలో వడ్డీ వసూలు కేసుకు సంబంధించి సుప్రీంకోర్టు బుధవారం విచారణ చేపట్టింది. ఇందులో వడ్డీ వసూళ్లకు వ్యతిరేకంగా వ్యాజ్యం దాఖలు చేసిన గజేంద్ర శర్మ తరఫున సీనియర్ న్యాయవాది రాజీవ్ దత్త సుప్రీంలో వాదనలు వినిపించారు. రుణాల పునర్నిర్మాణానికి బ్యాంకులకు పూర్తి స్వేచ్ఛ ఉన్నప్పటికీ.. నిజాయితీగా రుణాలు తిరిగి చెల్లిస్తున్న రుణగ్రహీతలపై మారటోరియంలో జరిమానాలు విధించడం సరికాదని.. రాజీవ్దత్తా సుప్రీం కోర్టుకు విన్నవించారు.
'ఆర్బీఐ తీసుకువచ్చిన మారటోరియం వెసులుబాటు ముగిసిన తర్వాతే ఈఎంఐలు చెల్లించొచ్చు అనుకున్నాం. కానీ మాకు మారటోరియం సమయంలోనూ వడ్డీ చెల్లించాలని తర్వాత తెలిసింది. ఇలాంటి సమయాల్లో వడ్డీపై వడ్డీ చెల్లించాల్సి రావడం అనేది మాపై మరింత భారం పెంచుతుంది.' అని ధర్మాసనానికి వివరించారు రాజీవ్ దత్త.
బ్యాంకులకు అర్బీఐ అనేక వేసులుబాటులు ఇచ్చిందన్న రాజీవ్ దత్త.. వినియోగదారులకు మాత్రం ఎలాంటి ఉపశమనం కల్పించలేదన్నారు. కరోనా సంక్షోభంలో జరిమానాలు విధిస్తున్న విషయాన్ని తప్పుబడుతూ.. ఆర్బీఐ నియంత్రణ సంస్థ మాత్రమేనని.. బ్యాంకులకు ఏజెంట్ కాదని వాదించారు.