100 సైనిక స్కూళ్లు- 15వేల బడులకు కొత్త కళ

ఉన్నత విద్యా కమిషన్​ను ఏర్పాటు చేసేందుకు ఈ ఏడాది చట్టాన్ని తీసుకురానున్నట్టు కేంద్ర ఆర్థికమంత్రి నిర్మలా సీతారామన్​ వెల్లడించారు. అదే సమయంలో నూతన జాతీయ విద్యా విధానంలో భాగంగా 15వేల పాఠశాలలను శక్తివంతంగా తీర్చిదిద్దనున్నట్టు స్పష్టం చేశారు.

నూతన జాతీయ విద్యా విధానంలో భాగంగా.. 15వేల పాఠశాలలను శక్తివంతంగా తీర్చిదిద్దనున్నట్టు కేంద్ర ఆర్థికమంత్రి నిర్మలా సీతారామన్​ వెల్లడించారు. అదే సమయంలో ఎన్​జీఓల భాగస్వామ్యంతో 100 కొత్త సైనిక్​ పాఠశాలలను ఏర్పాటు చేయనున్నట్టు పేర్కొన్నారు.

2021 బడ్జెట్​ను లోక్​సభలో ప్రవేశపెట్టారు నిర్మల. నూతన జాతీయ విద్యా విధానానికి సర్వత్రా ప్రశంసలు లభిస్తున్నాయని తెలిపారు. 2019-20 బడ్జెట్​లో.. ఉన్నతవిద్యా కమిషన్​ గురించి ప్రస్తావించినట్టు.. దానిని అమలు చేసేందుకు ఈ ఏడాది చట్టాన్ని తీసుకురానున్నట్టు పేర్కొన్నారు.

దేశవ్యాప్తంగా ఎన్నో వర్సిటీలు, ఇన్​స్టిట్యూషన్లు ఉన్నాయని వెల్లడించిన నిర్మల.. వాటి పనితీరును మెరుగుపరిచేందుకు ఈ కమిషన్​ తోడ్పడుతుందని స్పష్టం చేశారు. దీనికి సంబంధించిన గ్రాంట్లను కూడా అందిస్తామన్నారు.

ఇదీ చూడండి:-'వ్యవసాయ మౌలిక సదుపాయాలకు రూ. 40వేల కోట్లు'