మోదీ 2.0 ప్రభుత్వం తొలి రోజుల పాలన ఏకపక్షం. రాజకీయంగా, పరిపాలనపరంగా అంతా ఎన్డీఏకు అనుకూలమే. ఆర్థికపరంగా మాత్రం పెను సవాలు ఎదురైంది.
నరేంద్ర మోదీ రెండోసారి భారత ప్రధానిగా బాధ్యతలు చేపట్టేనాటికి మన ఆర్థిక వ్యవస్థ అనిశ్చితిలోనే ఉంది. అమెరికా-చైనా వాణిజ్య యుద్ధంతో ప్రపంచ ఆర్థిక స్థిరత్వమే ప్రమాదంలో ఉంది. వ్యవసాయ సంక్షోభం కూడా విజృంభిస్తోంది. గ్రామాల్లో ప్రజల ఆదాయం పెంచడం అతి పెద్ద సవాల్గా ఉంది. ఐఎల్ అండ్ ఎఫ్ఎస్లు పతనమై బ్యాంకింగేతర ఆర్థిక వ్యవస్థలు ద్రవ్య సంక్షోభాన్ని ఎదుర్కొన్నాయి.
బలమైన ప్రతికూల సంకేతాలు...
ప్రస్తుత పరిస్థితి మరింత ఆందోళన కలిగిస్తోంది. భారత ఆర్థిక వ్యవస్థ మాంద్యంలో కూరుకుపోతోందన్న సంకేతాలు ఇస్తోంది. ఈ ఆర్థిక సంవత్సరం తొలి త్రైమాసికంలో జీడీపీ వృద్ధి ఆరేళ్ల కనిష్ఠంతో 5 శాతానికి చేరింది. అంతకుముందు మార్చితో ముగిసిన త్రైమాసికంలో ఇది 5.8 శాతంగా ఉంది. 2018-19 తొలి త్రైమాసికంలో ఇది 8 శాతంగా ఉందంటే వృద్ధి ఎంతలా క్షీణిస్తుందో అర్థం చేసుకోవచ్చు.
వృద్ధి మందగమనం... ఉపాధిపై తీవ్ర ప్రభావం చూపుతోంది. 2019 ఏప్రిల్-ఆగస్టు మధ్యలో ఆటోమొబైల్ రంగంలో.. 3 లక్షల 50 వేల ఉద్యోగాలకు కోత పడింది. 10 శాతం వృద్ధిని మాత్రమే సాధించింది.
ఎఫ్ఎంసీజీ రంగానిదీ అదే పరిస్థితి. సబ్బులు, సుగంధ ద్రవ్యాలు, టీ పొడి అమ్మకాలు క్షీణించాయి. పార్లే వంటి సంస్థలు... తమ ఉత్పత్తులకు డిమాండ్ తగ్గడం వల్ల పదో వంతు ఉద్యోగుల్ని తొలగించాయి.
''ఐటీ, ఈ-కామర్స్ రంగాల్లో కొంత ఆందోళనకర పరిస్థితి నెలకొంది. ఈ పరిశ్రమల్లో పురోగతి కోసం... ప్రభుత్వం ఎన్నో చర్యలు తీసుకుంది. ఆ దిశగా పయనిస్తోంది. కానీ.. ఆటో, వస్త్ర పరిశ్రమల్లో ఎన్నో సవాళ్లున్నాయి. ఈ రంగాల్లో మెరుగైన ఫలితాల కోసం... కేంద్రం దిద్దుబాటు చర్యలు తీసుకుంటుంది. అవసరమైన ప్యాకేజీలు అందించేందుకు ప్రభుత్వం సిద్ధంగా ఉంది. ఏం చేస్తే బాగుంటుందో, ఎలా అభివృద్ధి పథంలో దూసుకెళ్తాయో అన్నింటినీ పరిశీలిస్తుంది.''
- గోపాల్ అగర్వాల్, భాజపా జాతీయ అధికార ప్రతినిధి
మాంద్యానికి 'సీతమ్మ' మందు
మాంద్యం రూపంలో పొంచి ఉన్న ముప్పును కేంద్రం సకాలంలోనే గుర్తించింది. నష్టనివారణ కోసం పలు కీలక నిర్ణయాలు తీసుకుంది.
తొలుత దేశీయ, విదేశీ సంస్థాగత మదుపర్లపై సర్ఛార్జీ ఉపసంహరణతో దిద్దుబాటు చర్యలు ఆరంభించింది కేంద్రం. ఎఫ్డీఐ నిబంధనల సరళీకరణ, ఇటీవలి బ్యాంకుల విలీనం వరకు కీలకాస్త్రాలన్నీ ప్రయోగిస్తూనే ఉంది.
తొలుత 2019 ఆగస్టు 28న స్టార్టప్లకు ఏంజెల్ టాక్స్ మినహాయింపు, ప్రభుత్వ రంగ బ్యాంకులకు 70 వేల కోట్ల మూలధన నిధులు, ఆటో రంగానికి ప్రోత్సాహం, పాత వాహనాల రద్దు వంటి కీలక నిర్ణయాలెన్నో తీసుకుంది కేంద్రం.