ట్విట్టర్​ సీఈఓ ఖాతానే హ్యాక్​ చేసేశారు!

ట్విట్టర్​ సీఈఓ, సహ వ్యవస్థాపకుడు జాక్​ డోర్సీ ఖాతాను గుర్తుతెలియని వ్యక్తులు హ్యాక్​ చేశారు. ఖాతానుంచి అనుచితమైన సందేశాలను పోస్ట్​ చేశారు. అప్రమత్తమైన నిపుణుల బృందం హ్యాకర్ల ముప్పునుంచి కాపాడింది.

హ్యాకర్లు రోజురోజుకీ రెచ్చిపోతున్నారు. ఎంతటి ప్రముఖుల ఖాతాలనైనా ఇట్టే హ్యాక్​ చేసేస్తున్నారు. తాజాగా ట్విట్టర్​ సీఈఓ, సహ వ్యవస్థాపకుడు జాక్​ డోర్సీ ఖాతాను గుర్తు తెలియని దుండగులు శుక్రవారం హ్యాక్​ చేశారు. దాదాపు 15 నిమిషాల పాటు డోర్సీ ట్విట్టర్​ను హైజాక్​ చేశారు.

అనుచిత వ్యాఖ్యలు పోస్ట్​

ఖాతా నుంచి అనుచిత సందేశాలు పంపారు. జాత్యహంకార, దేశ విద్రోహ వ్యాఖ్యలను దుండగులు.. సీఈఓ ట్విట్టర్ ఖాతా నుంచి పోస్ట్​ చేశారు. వెంటనే పసిగట్టిన సంస్థకు చెందిన నిపుణుల బృందం అప్రమత్తమైంది. జాక్​ ఖాతాను హ్యాకర్ల ముప్పు నుంచి కాపాడింది.

నెటిజన్ల ఆగ్రహం

డోర్సీ ట్విట్టర్​ ఖాతాను అసలు ఎలా హ్యాక్​ చేశారు? భద్రతా లోపాలు ఎక్కడ ఉన్నాయి? వంటి విషయాలపై సమగ్ర దర్యాప్తు జరిపిస్తామని ట్విట్టర్​ ప్రతినిధి వెల్లడించారు. ఈ ఉదంతంపై నెటిజన్లు తీవ్ర ఆగ్రహం వ్యక్తం చేశారు. కంపెనీ చీఫ్​ ఖాతానే కాపాడలేనప్పుడు మామూలు యూజర్ల పరిస్థితి ఏంటని నిలదీస్తున్నారు.