అంకురాలపై మరో ఏడాది కరోనా ప్రభావం

దేశ ఆర్థిక స్థితిగతులను మార్చ గలిగే శక్తి అంకురాలకు ఉంది. కరోనా మూలంగా వాటిపై చాలా వరకు ప్రతికూల ప్రభావం పడింది. లాక్‌డౌన్‌ కంటే పరిస్థితులు ఇప్పుడు మెరుగు పడ్డప్పటికీ పెట్టుబడుల విషయంలో ఇంకా సందిగ్ధత కొనసాగుతూనే ఉందని అంకురాల ప్రతినిధులు చెబుతున్నారు. సంవత్సరం వరకు పరిస్థితి ఇలాగే ఉండొచ్చని అభిప్రాయపడుతున్నారు.

కరోనా ప్రభావం ప్రతి రంగంపై తీవ్రంగా పడింది. అంకురాలపై ఈ ప్రభావం ఎక్కువగానే ఉంది. లాక్‌డౌన్‌ తదనంతర పరిస్థితులు, భవిష్యత్తుపై ఇంకా స్పష్టత రాకపోవటం వల్ల అవి ఇంకా సందిగ్ధంలోనే కొనసాగుతున్నాయి. లాక్‌డౌన్‌ నుంచే వాటిలో పెట్టుబడులు చాలా వరకు ఆగిపోయాయి. ఆ పరిస్థితి ఇంకా మెరుగుపడలేదని అంకురాల వ్యవస్థాపకులు చెబుతున్నారు.

దేశంలో కరోనా మహమ్మారి ప్రారంభమైనప్పటి నుంచే అంకురాల్లో పెట్టుబడులపై ప్రతికూల ప్రభావం పడింది. వేచి చూసే ధోరణిలో పెట్టుబడిదారులు ఉన్నారు. ఇప్పటికే అదే పరిస్థితి కూడా కొనసాగుతోంది. అయితే కొన్ని రంగాలకు సంబంధించిన వాటిలో పెట్టుబుడులు వస్తున్నాయి.

కరోనా ప్రారంభమైన మొదట్లోనే కొన్ని అంకురాలు కో-వర్కింగ్‌ స్పేస్‌ నుంచి కార్యకలాపాలను ఇంటి వద్దనుంచే నిర్వహిస్తున్నాయి. లాక్‌డౌన్‌ మొదట్లోనే సాంకేతిక అంకురాలు ఆన్‌లైన్‌కు మారిపోయాయి. అయితే ఇప్పటికీ ఆ పరిస్థితే కొనసాగుతోంది. సాధారణంగానే తక్కువ మందితో పనిచేసే అంకురాల్లో జీతాలు పూర్తిగా ఇవ్వలేని పరిస్థితి ఇంకా కొనసాగుతోంది.

కొన్నింటికి లాభం, మరికొన్నింటికి నష్టం...

కొన్ని రంగాల్లోని అంకురాలపై ప్రతికూల ప్రభావం పడగా… కొన్నింటికి అభివృద్ధికి మాత్రం కరోనా ఉపయోగపడింది. లాజిస్టిక్స్‌, ఫుడ్‌ డెలివరీ, ట్రాన్స్‌పోర్ట్‌ లోని అంకురాలపై ప్రతికూల ప్రభావం పడింది. విమానయానానికి సంబంధించిన అంకురాలు కూడా తీవ్రంగా నష్టపోయాయి. ఆరోగ్య సంబంధింత అంకురాలు.. మెడిసిన్‌, సరుకుల డెలివరీ, ఎడ్యూకేషన్‌, ఎంటర్‌టైన్‌మెంట్‌ యాప్‌ల అంకురాలు లాంటివి లాభపడ్డాయి.

పరిస్థితులకు అనుగుణంగా మారుతోన్న అంకురాలు లాభపడ్డట్లు ప్రతినిధులు చెబుతున్నారు. కరోనా మూలంగా కొన్ని వ్యాపార శైలిని మార్చుకున్నాయి. ఒలా, ఉబర్‌ లాంటి సంస్థలు షేరింగ్‌ ఆప్షన్‌ ను తీసేశాయి. అంతేకాకుండా కరోనా వ్యాప్తి జరగకుండా డ్రైవర్‌కు ప్రయాణికుడికి భౌతికంగా సంబంధం ఉండకుండా చర్యలు తీసుకున్నాయి. దీనివల్ల ప్రయాణికులు కూడా వాటిల్లో ప్రయాణించేందుకు మొగ్గుచూపుతున్నారు. చిన్న అంకురాలు కూడా వాటి వ్యూహంలో మార్పులు చేసుకుంటున్నాయి.

పెద్ద సంస్థల పోటీ తట్టుకోలేక!

ప్రతి రంగంలో ఉన్న అవకాశాలకు అనుగుణంగా పెద్ద కంపెనీలు... ప్రత్యేకంగా కార్యకలాపాలను ప్రారంభించటమో లేక అంకురాలను కొనుగోలు చేయటమో చేస్తున్నాయి. పెద్ద కంపెనీలతో పోటీని తట్టుకోలేమన్న ఉద్దేశంతో అలాంటి కార్యకలాపాలు నిర్వహిస్తోన్న లేదా సంబంధింత వ్యాపారాల్లో ఉన్న అంకురాల్లో పెట్టుబడులు పెట్టేందుకు ఎవరూ మొగ్గుచూపటం లేదు. దీనితో అంకురాలకు అవకాశాలు దెబ్బతింటున్నాయని నిపుణులు చెబుతున్నారు.

కరోనాను అవకాశంగా మార్చుకున్న అంకురాలు లాభపడ్డాయి. ఆరోగ్యం పట్ల ప్రజల్లో అవగాహన పెరిగింది. దీనితో మంచి ఆహారం తీసుకోవాలని వారు అనుకుంటున్నారు. హైడ్రోపానిక్స్‌ సాంకేతికత ద్వారా ఇంటిపై మొక్కలు పెంచే అంకురం, ఆర్గానిక్ ఉత్పత్తులు అందించే అంకురాలు తదితర సంస్థల కార్యకలాపాలు విస్తృతం అయ్యాయి.

ఏడాది పాటు..

అంకురాలకు సంబంధించి సాధారణ పరిస్థితి వచ్చేందుకు కనీసం ఒక సంవత్సరం పడుతుందని భావిస్తున్నట్లు అంకుర సంస్థల ప్రతినిధులకు అవగాహన కల్పించే వారు చెబుతున్నారు. సమస్యను అవకాశంగా మార్చుకొని, భిన్న మైన పరిష్కారంతో వచ్చే వారికి పెట్టుబడులు, కార్యకలాపాలు మంచి స్థాయిలో ఉంటాయని వారు తెలుపుతున్నారు.

ఇదీ చూడండి: స్టార్టప్ ర్యాంకుల్లో మళ్లీ ఆ రాష్ట్రమే టాప్​