వృద్ధి భయాలతో.. మార్కెట్లకు రెండో రోజూ నష్టాలే

వరుసగా రెండో రోజూ స్టాక్​ మార్కెట్లు నష్టాలను నమోదు చేశాయి. ఆర్థిక వృద్ధి భయాలతో మదుపరులు అమ్మకాలకు మొగ్గుచూపడం నేటి నష్టాలకు కారణం. సెన్సెక్స్ నేడు 181 పాయింట్లు క్షీణించింది. నిఫ్టీ 51 పాయింట్లు కోల్పోయింది.

స్టాక్​ మార్కెట్లు నేడు నష్టాలతో ముగిశాయి. ఐటీ రంగ షేర్లు కుదేలవ్వడం నేటి నష్టాలకు కారణంగా తెలుస్తోంది. దీనికి తోడు.. దేశ ఆర్థిక వృద్ధి ఆందోళనకరంగా ఉందని అంతర్జాతీయ ద్రవ్య నిధి సంస్థ చేసిన ప్రకటన మదుపరుల సెంటిమెంట్​ను దెబ్బతీసింది. ఫలితంగా అమ్మకాల ఒత్తిడికి లోనయిన సూచీలు చివరకు నష్టాలతో ముగిశాయి.

బొంబాయి స్టాక్​ ఎక్స్చేంజి సూచీ-సెన్సెక్స్ 181 పాయింట్లు క్షీణించింది.. చివరకు 41,461 వద్ద స్థిరపడింది. జాతీయ స్టాక్​ ఎక్స్చేంజి సూచీ-నిఫ్టీ 51 పాయింట్ల స్వల్ప నష్టంతో 12,212 వద్దకు చేరింది.

ఇంట్రాడే సాగిందిలా..

సెన్సెక్స్​ 41,703 పాయింట్ల గరిష్ఠాన్ని తాకగా.. 41,423 పాయింట్ల కనిష్ఠాన్ని నమోదు చేసింది.
నిఫ్టీ నేడు 12,284 పాయింట్ల అత్యధిక స్థాయి.. 12,202 పాయింట్ల అత్యల్ప స్థాయిల మధ్య కదలాడింది.

లాభనష్టాల్లోనివి ఇవే..

ఇండస్​ఇండ్ బ్యాంక్​ 1.69 శాతం, ఓఎన్​జీసీ 0.76 శాతం, హీరో మోటార్స్ 0.51 శాతం, కోటక్​ బ్యాంక్ 0.50 శాతం, నెస్లే ఇండియా 0.41 శాతం, పవర్​ గ్రిడ్ 0.40 శాతం లాభాలను ఆర్జించాయి.

హెచ్​సీఎల్​ టెక్​ 1.80 శాతం, రిలయన్స్ ఇండస్ట్రీస్​ 1.59 శాతం, హెచ్​డీఎఫ్​సీ బ్యాంక్​ 1 శాతం, టీసీఎస్​ 0.78 శాతం, టెక్​మహీంద్రా 0.75 శాతం నష్టాలను నమోదు చేశాయి.

• క్రిస్మస్​ సందర్భంగా రేపు స్టాక్ మార్కెట్లకు సెలవు

ఇదీ చూడండి:తీవ్రమైన ఆర్థిక మందగమనంలో భారత్: ఐఎంఎఫ్​