వాణిజ్య యుద్ధం ముగింపు ఆశలతో రెండో రోజూ జోరు

అంతర్జాతీయ సానుకూలతలతో స్టాక్ మార్కెట్లు నేడు లాభాలను నమోదు చేశాయి. సెన్సెక్స్ 292 పాయింట్లు వృద్ధి చెందింది. నిఫ్టీ 87 పాయింట్లు పుంజుకుంది. వేదాంత అధికంగా లాభపడగా.. భారతీ ఎయిర్​టెల్​ ఎక్కువగా నష్టపోయింది.

అమెరికా-చైనా వాణిజ్య యుద్ధానికి తెరపడుతుందన్న ఆశలతో స్టాక్​ మార్కెట్లు నేడు లాభాలతో ముగిశాయి. లోహ, వాహన, బ్యాంకింగ్ రంగ షేర్ల సానుకూలత నేటి లాభాలకు మరో కారణం.

బొంబాయి స్టాక్​ ఎక్స్చేంజి సూచీ-సెన్సెక్స్ 292 పాయింట్లు పుంజుకుంది. చివరకు 38,506 వద్ద స్థిరపడింది. జాతీయ స్టాక్​ ఎక్స్చేంజి సూచీ-నిఫ్టీ 87 పాయింట్లు లాభపడి..11,428 వద్దకు చేరింది.

ఇంట్రాడే సాగిందిలా

సెన్సెక్స్​ 38,635 పాయింట్ల గరిష్ఠాన్ని తాకగా.. 38,238 పాయింట్ల కనిష్ఠాన్ని నమోదు చేసింది.
నిఫ్టీ నేడు 11,462 పాయింట్ల అత్యధిక స్థాయి.. 11,342 పాయింట్ల అత్యల్ప స్థాయిల మధ్య కదలాడింది.

లాభనష్టాల్లోనివి ఇవే..

వేదాంత 3.79 శాతం, ఎం&ఎం 2.83 శాతం, ఓఎన్​జీసీ 2.66 శాతం, హీరో మోటార్స్ 2.63 శాతం, మారుతీ 2.47 శాతం, హెచ్​యూఎల్​ 2.41 శాతం లాభపడ్డాయి.

భారతీ ఎయిర్​టెల్​ 2.60 శాతం, ఇన్ఫోసిస్ 2.27 శాతం, టాటా మోటార్స్ 0.67 శాతం, హెచ్​సీఎల్​ టెక్ 0.27 శాతం నష్టాలను మూటగట్టుకున్నాయి.

ఇదీ చూడండి: రూ.8వేలలోపు ఉత్తమ బడ్జెట్​ స్మార్ట్​ఫోన్లు ఇవే..!