రిలయన్స్ ఇండస్ట్రీస్ ఫార్చూన్ గ్లోబల్ 500 జాబితాలో 106వ స్థానాన్ని దక్కించుకుంది. గత ఏడాదితో పోలిస్తే 42 స్థానాలు ఎగబాకింది ముకేశ్ అంబానీ నేతృత్వంలోని పరిశ్రమల దిగ్గజం.
2010లో ఫార్చూన్ జాబితా ప్రారంభించినప్పటి నుంచి అగ్ర స్థానంలో (భారత్ నుంచి) ఉంటున్న ఇండియన్ ఆయిల్ కార్పొరేషన్ (ఐఓసీ)ని వెనక్కి నెట్టింది రిలయన్స్. ఈ ఏడాది ఫార్చూన్ గ్లోబల్ 500 జాబితాలో 117వ స్థానంతో సరిపెట్టుకుంది ఐఓసీ.
ఫార్చూన్ గ్లోబల్ 500 జాబితాలో అమెరికాకు చెందిన 'వాల్మార్ట్' మళ్లీ ప్రథమ స్థానాన్ని నిలబెట్టుకుంది.
రిలయన్స్ ఆదాయం 32 శాతం వృద్ధి
2018-19 నాటికి రిలయన్స్ ఆదాయం 32.1 శాతం పెరిగి.. 82.3 బిలియన్ డాలర్లకు చేరింది. 2017-18లో సంస్థ ఆదాయం 62.3 బిలియన్ డాలర్లుగా ఉంది.
ప్రభుత్వ రంగ సంస్థ ఐఓసీ ఆదాయం 2018-19 నాటికి 17.7 శాతం వృద్ధితో 77.6 బిలియన్ డాలర్లుగా నమోదైంది. 2017-18లో సంస్థ ఆదాయం 65.9 బిలయన్ డాలర్లుగా ఉంది.
ఫార్చూన్ జాబితాలో 7 భారత కంపెనీలు
రిలయన్స్, ఐఓసీ మినహా ఫార్చూన్ గ్లోబల్ 500లో చోటు దక్కించుకున్న కంపెనీల్లో.. ఓఎన్జీసీ (160), ఎస్బీఐ (236), టాటా మోటార్స్ (265), బీపీసీఎల్ (275), రాజేశ్ ఎక్స్పోర్ట్స్ (495) సంస్థలు ఉన్నాయి.
ఇదీ చూడండి: 'వచ్చే రెండేళ్లలో తగ్గనున్న భారత వృద్ధిరేటు'
