ఎగుమతుల్లో మారుతీ సుజుకీ మరో ఘనత

మారుతీ సుజుకీ మరో ఘనత సాధించింది. విదేశాలకు వాహనాల ఎగుమతుల్లో మరో మైలురాయిని అందుకుంది. 1986-87 నుంచి ఇప్పటి వరకు 35 ఏళ్లలో 20 లక్షల వాహనాలను ఎగుమతి చేసినట్లు ప్రకటించింది.

దేశీయ అతిపెద్ద వాహన తయారీ సంస్థ మారుతీ సుజుకీ ఇండియా మరో ఘనత సాధించింది. 1986-87 ఆర్థిక ఏడాది నుంచి ఇప్పటి వరకు (35 ఏళ్లు) రెండు మిలియన్ల(20 లక్షలు) వాహనాలను ఎగుమతి చేసినట్లు ప్రకటించింది.

ఈ సంస్థ తొలిసారిగా 1987లో 500 కార్లను హంగేరీకి ఎగుమతి చేసింది. అప్పటి నుంచి వెనుదిరిగి చూసుకోకుండా వాహనాల ఎగుమతిలో దూసుకెళుతోంది. 2012-13లో 10 లక్షల ఎగుమతుల మైలు రాయిని అందుకుంది.

" తొలి 10 లక్షల ఎగుమతుల్లో 50 శాతం ఐరోపా దేశాల్లో మార్కెట్​ వృద్ధికి దోహదపడ్డాయి. ఆ తర్వాత రెండో మైలురాయిని 8ఏళ్లల్లో అందుకున్నాం. లాటిన్​ అమెరికా, ఆఫ్రికా, ఆసియా ప్రాంతాల్లో పెరుగుతున్న మార్కెట్​ను అందిపుచ్చుకోవటం వల్ల అది సాధ్యపడింది. సంస్థ నిరంతర కృషితో చిలీ, ఇండోనేషియా, దక్షిణాఫ్రికా, శ్రీలంక వంటి దేశాల్లో మంచి మార్కెట్​ను సంపాదించింది. ఆయా మార్కెట్లలో ఆల్టో, బలెనో, డిజైర్​, స్విఫ్ట్​ కార్లకు మంచి ఆదరణ ఉంది. "

- మారుతీ సుజుకీ

100కుపైగా దేశాలకు

ప్రస్తుతం తమ ఉత్పత్తులను 100కు పైగా దేశాలకు ఎగుమతి చేస్తున్నట్లు తెలిపింది మారుతీ సుజుకీ. అందులో 14 మోడల్స్​, సుమారు 150 వేరియంట్లు ఉన్నట్లు వెల్లడించింది. ఈ ఏడాది జనవరి నుంచి కంపాక్ట్​ ఆఫ్​ రోడ్​ మోడల్​ జిమ్నీ ఉత్పత్తి ప్రారంభించి.. ఎగుమతులు చేస్తోంది.

ఇదీ చూడండి: డీజిల్ సెగ్మెంట్​లోకి మారుతీ రీ ఎంట్రీ!