నయా ట్రెండ్​: ఆవు పేడ సబ్బు, వెదురు నీటి బాటిల్

ప్లాస్టిక్​ ఉత్పత్తులపై ఆంక్షల నేపథ్యంలో.. ఖాదీ, గ్రామీణ పరిశ్రమల కమిషన్ పలు సహజ ఉత్పత్తులను ఆవిష్కరించింది. ఆవుపేడతో తయారు చేసిన సబ్బులు, వెదురు నీటి బాటిళ్లను అందుబాటులోకి తెచ్చింది. కేంద్ర మంత్రి నితిన్ గడ్కరీ వీటిని మార్కెట్లోకి విడుదల చేశారు.

ఆవు పేడ సబ్బులు, వెదురు కర్రలతో తయారు చేసిన నీటి బాటిళ్లను కేంద్ర మంత్రి నితిన్​ గడ్కరీ మార్కెట్లోకి విడుదల చేశారు. ఖాదీ, గ్రామీణ పరిశ్రమల కమిషన్(కేవీఐసీ) ఈ ఉత్పత్తులను తయారు చేసింది.

125 గ్రాముల అవు పేడ సబ్బు ధర రూ.125. వెదురు నీళ్ల బాటిల్ ధర రూ.560.

గాంధీ జయంతి సందర్భంగా ఒక సారి వాడి పడేసే ప్లాస్టిక్​పై నిషేధం విధిస్తూ కేంద్రం తీసుకున్న నిర్ణయం నేపథ్యంలో ఈ ఆవిష్కరణలకు ప్రాధాన్యం ఏర్పడింది. సేంద్రియ వ్యవసాయం, సహజ ఉత్పత్తులతో మున్ముందు మంచి ఫలితాలు వస్తాయని ఎంఎస్​ఎంఈ మంత్రి నితిన్​ గడ్కరీ ఉద్ఘాటించారు.

సహజ ఉత్పత్తులు తయారు చేస్తున్న సూక్ష్మ, చిన్న మధ్య తరహా పరిశ్రమలను (ఎంఎస్​ఎంఈ) గడ్కరీ ప్రశంసించారు. ఈ పరిశ్రమల్లో ఆదరణ ఎక్కువగా ఉన్న సంస్థలు స్టాక్ మార్కెట్లో నమోదుకావాలని కోరారు. ఇలా నమోదైన సంస్థల్లో 10 శాతం వాటాను కేంద్రం కొనుగోలు చేసే విధంగా గడ్కరీ ఓ ప్రతిపాదనను ఎంఎస్ఎంఈల ముందు ఉంచారు.

రానున్న రెండేళ్లలో కేవీఐసీ రూ.10,000 కోట్ల ఆదాయం గడిస్తుందని.. ఫలితంగా గ్రామీణ ప్రాంతాల్లో భారీగా ఉద్యోగ అవకాశాలు వస్తాయని గడ్కరీ ఆకాంక్షించారు.

ఇదీ చూడండి: బ్యాంకులపై అపోహలు వద్దు.. ఆర్బీఐ హామీ!