జెట్ ఎయిర్వేస్ వ్యవస్థాపకుడు, మాజీ అధినేత నరేశ్ గోయెల్కు దిల్లీ హైకోర్టులో చుక్కెదురైంది. విదేశాలకు వెళ్లేందుకు అనుమతి నిరాకరిస్తూ తీర్పునిచ్చింది న్యాయస్థానం. ఒక వేళ విదేశాలకు వెళ్లాలనుకుంటే రూ.18,000 కోట్ల పూచీకత్తు సమర్పించాలని షరతు విధించింది.
తనపై ఉన్న లుక్ అవుట్ నోటీసులను సవాలు చేస్తూ గోయెల్ వేసిన వ్యాజ్యంపై అభిప్రాయం చెప్పాలని కేంద్రాన్ని ఆదేశించింది.
లుక్ అవుట్ నోటీసులు ఎప్పుడంటే?
జెట్ ఎయిర్వేస్ సంస్థ రూ.8వేల కోట్లకుపైగా రుణభారంతో తీవ్ర ఆర్థిక సంక్షోభంలో చిక్కుకుంది. విధిలేని పరిస్థితుల్లో కొంతకాలం క్రితం మూతపడింది. అయితే... ఈ మొత్తం వ్యవహారంలో రూ.18 వేల కోట్ల కుంభకోణం జరిగిందన్న ఆరోపణలపై తీవ్ర నేరాల దర్యాప్తు సంస్థ-ఎస్ఎఫ్ఐఓ విచారణ జరుపుతోంది.
జెట్ ఎయిర్వేస్ వ్యవస్థాపకుడు నరేశ్ గోయెల్, ఆయన భార్య అనిత మే 25న దుబాయ్ మీదగా లండన్ వెళ్లేందుకు ముంబయిలో విమానం ఎక్కారు. మరికొద్ది సేపట్లో విమానం టేకాఫ్ అవ్వాల్సి ఉండగా.. అధికారులు వారిని కిందకు దింపారు. వారిద్దరిపై లుక్ అవుట్ నోటీసులు జారీ అయినట్లు తెలిపారు.
ఎలాంటి కేసు నమోదు చేయకుండా లుక్ అవుట్ నోటీసులు జారీ చేయడాన్ని గోయెల్ తప్పుబడుతూ దిల్లీ హైకోర్టును ఆశ్రయించారు. అయితే ఆయన వాదనల్ని న్యాయస్థానం తోసిపుచ్చింది. విచారణను ఆగస్టు 23కు వాయిదా వేసింది.
ఇదీ చూడండి: 'బడ్జెట్ ప్రతిపాదనలతో స్థిరాస్తి రంగానికి ఊతం'
