సైబర్ నేరగాళ్ల బారి (Cyber crimes) నుంచి తప్పించుకునేందుకు వాట్సాప్ తన యూజర్స్‌కు కీలక సూచనలు చేసింది. ఇందులో భాగంగా వాట్సాప్ యూజర్స్ వాట్సాప్ మోడ్ (WhatsApp mods) యాప్స్‌ను ఉపయోగించొద్దని సూచించింది. ఇంతకీ మోడ్ యాప్స్ అంటే ఏంటి? వాటిని ఉపయోగిస్తే ఏమవుతుంది? వాట్సాప్ ఎందుకు మోడ్ యాప్స్‌ని ఉపయోగించొద్దని చెబుతోందో ఇప్పుడు తెలుసుకుందాం.
వాటిలో సెక్యూరిటీ ఫీచర్స్ లేవు..
మోడ్ యాప్స్ లేదా మోడిఫైడ్ యాప్స్‌లో సాధారణ యాప్స్‌లో ఉండే ఫీచర్స్ కంటే కొన్ని రకాల ఫీచర్స్ అదనంగా ఉంటాయి. అయితే ఇవి ఆమోదయోగ్యమైనవి కాదని వాట్సాప్ చెబుతోంది. సాధారణ యాప్స్ కంటే మోడ్ యాప్స్ ఎక్కువ ఫీచర్స్‌ని అందిస్తున్నప్పటికీ, వీటిలోని భద్రతాపరమైన లోపాల కారణంగా హ్యాకర్స్‌ యూజర్ ఫోన్లలోని సమాచారాన్ని సులువుగా దొంగిలిస్తున్నారని తెలిపింది. వాట్సాప్లో ఉన్న విధంగా మోడ్ యాప్స్‌లో సెక్యూరిటీ ఫీచర్స్ ఉండవని పేర్కొంది. అందుకే యూజర్స్ వాట్సాప్ మోడ్ యాప్స్‌ను డౌన్‌లోడ్ చేసుకోవద్దని సూచిస్తోంది.