ఆటో, ఐటీ షేర్ల దన్నుతో ఆరంభ నష్టాలకు బ్రేక్

స్టాక్ మార్కెట్లు సోమవారం లాభాలతో ముగిశాయి. సెన్సెక్స్ 173 పాయింట్లు బలపడింది. నిఫ్టీ 81 పాయింట్లు పుంజుకుంది. ఐటీ, ఆటో షేర్ల సానుకూలతలు లాభాలకు ప్రధాన కారణం.

ఒడుదొడుకుల ట్రేడింగ్​లో చివరకు లాభాలతో ముగిశాయి స్టాక్ మార్కెట్లు. సోమవారం సెషన్​లో బీఎస్ఈ-సెన్సెక్స్ 173 పాయింట్లు బలపడి 38,051 వద్ద స్థిరపడింది. నిఫ్టీ 81 పాయింట్లు పుంజుకుని 11,259 వద్దకు చేరింది.

ఐటీ, ఆటో, విద్యుత్​ షేర్లు సానుకూలంగా స్పందించడం సోమవారం లాభాలకు ప్రధాన కారణం. వీటికి తోడు ఆరంభంలో నష్టాలను నమోదు చేసిన ఆర్థిక షేర్లు మిడ్​ సెషన్ తర్వాత కాస్త తేరుకోవడం కూడా లాభాలకు దన్నుగా నిలిచినట్లు తెలుస్తోంది.

ఇంట్రాడే..

సెన్సెక్స్ 38,120 పాయింట్ల అత్యధిక స్థాయి, 37,734 పాయింట్ల అత్యల్ప స్థాయిలను నమోదు చేసింది.

నిఫ్టీ 11,267 పాయింట్ల గరిష్ఠ స్థాయి; 11,144 పాయింట్ల కనిష్ఠ స్థాయిల మధ్య కదలాడింది.

లాభనష్టాల్లోనివి ఇవే..

ఎన్​టీపీసీ, బజాజ్​ ఆటో, టెక్ మహీంద్రా, మారుతీ, ఎన్​టీపీసీ, ఓఎన్​జీసీ షేర్లు లాభాల్లో ప్రధానంగా ఉన్నాయి.

ఎస్​బీఐ, భారతీ ఎయిర్​టెల్, రిలయన్స్ ఇండస్ట్రీస్​, సన్​ఫార్మా, ఐసీఐసీఐ బ్యాంక్ నష్టాలను నమోదు చేశాయి.

ఆసియా మార్కెట్లు..

ఆసియాలో ప్రధాన మార్కెట్లు అయిన షాంఘై, హాంకాంగ్ సూచీలు లాభాలను గడించాయి. టోక్యో​, సియోల్​ సూచీలు మాత్రం నష్టాలతో ముగిశాయి.

రూపాయి

కరెన్సీ మార్కెట్​లో రూపాయి సోమవారం 2 పైసలు బలపడింది. డాలర్​తో పోలిస్తే మారకం విలువ 74.88 వద్ద ఫ్లాట్​గా ఉంది.

ఇదీ చూడండి:షేర్​ చాట్​లో గూగుల్ భారీ పెట్టుబడులు!