'పట్టణీకరణలో పెట్టుబడులకు భారత్​ భేష్​'

పట్టణీకరణ, మొబిలిటీ, ఆవిష్కరణల్లో పెట్టుబడులకు భారత్ అత్యంత ఆకర్షణీయమైన గమ్యస్థానమని ప్రధాని నరేంద్రమోదీ ఉద్ఘాటించారు. వచ్చే రెండు దశాబ్దాల్లో భారత్, కొన్ని ఆఫ్రికా దేశాలు పట్టణీకరణలో చాలా పెద్ద మార్పులకు సాక్ష్యంగా నిలుస్తాయని పేర్కొన్నారు.

కరోనా తర్వాత ప్రపంచాన్ని పునర్నిర్మించాల్సి ఉంటుందని ప్రధాని నరేంద్రమోదీ అన్నారు. బ్లూమ్​బర్గ్ న్యూ ఎకానమీ ఫోరమ్​లో ప్రసంగించిన మోదీ.. నగరాలు జీవనానికి మరింత అనుకూలంగా మారాల్సి ఉంటుందన్నారు.

ఈ పరిస్థితుల్లో పట్టణీకరణ, ఆవిష్కరణల్లో పెట్టుబడులు పెట్టేవారికి భారత్ మంచి గమ్యస్థానమని తెలిపారు.

"2022 నాటికి కోటి ఇళ్లను నిర్మించి ఇవ్వాలని లక్ష్యంగా పెట్టుకున్నాం. 100 స్మార్ట్​ సిటీల్లో రూ.2లక్షల కోట్లు పెట్టుబడులు పెట్టాం. ఇప్పటికే రూ.1.4 లక్షల కోట్ల ప్రాజెక్టులు పూర్తయ్యాయి లేదా చివరి దశలో ఉన్నాయి. మీరు పట్టణీకరణలో పెట్టుబడులు పెట్టాలంటే భారత్​లో మంచి అవకాశాలు ఉన్నాయి. సుస్థిర రంగాల్లో పెట్టుబడులకు అయితే మరింత సౌలభ్యం ఉంటుంది."

- నరేంద్రమోదీ, ప్రధానమంత్రి

ఈ అవకాశాలన్నీ భారత్​లోని ప్రజాస్వామ్యం, వాణిజ్య వాతావరణం, అతిపెద్ద మార్కెట్​ వల్లనే సాధ్యమవుతాయని మోదీ అన్నారు. పట్టణీకరణలో భారత్​ మరింత దూకుడుగా వెళుతోందని తెలిపారు.

ఇదీ చూడండి:'ఉగ్రవాదంపై ఆ దేశాలను బాధ్యులుగా చేయాలి'