తయారీ రంగంలో క్షీణత, వ్యవసాయ స్తబ్ధత కారణంగా 2019-20 ఆర్థిక సంవత్సరం ఏప్రిల్-జూన్ త్రైమాసికంలో దేశ వృద్ధి రేటు(జీడీపీ) 5 శాతంగా నమోదైంది. జాతీయ గణాంక సంస్థ(ఎన్ఎస్ఓ) ఈ వివరాల్ని ప్రకటించింది.
తయారీ రంగంలో గ్రాస్ వాల్యూ యాడెడ్‌ (జీవీఏ) వృద్ధి 0.6 శాతంగా నమోదైంది. గతేడాది ఇదే త్రైమాసికంలో ఇది 12.1 శాతంగా ఉంది. వ్యవసాయ రంగంలో జీవీఏ 2 శాతంగా నమోదు కాగా గతేడాది ఏప్రిల్- జూన్ త్రైమాసికంలో 5.1గా ఉంది. నిర్మాణ రంగంలో గత ఏప్రిల్-జూన్ త్రైమాసికంలో 9.6 శాతంగా నమోదైన జీవీఏ 5.7 శాతానికి దిగజారింది. మైనింగ్ రంగంలో మాత్రం వృద్ధిరేటు 0.4 శాతం నుంచి 2.7శాతానికి పెరిగింది.
ఇవే కారణాలు...
2012-13 ఆర్థిక సంవత్సరం చివరి త్రైమాసికంలో 4.9గా నమోదైన జీడీపీ ఆ తర్వాత ఈ స్థాయిలో క్షీణించడం ఇదే తొలిసారి. కార్లనుంచి బిస్కెట్ల వరకూ అమ్మకాల్లో తగ్గుదల వివిధ రంగాల్లో ఉద్యోగుల ఉద్వాసన, వినియోగదారుల కొనుగోళ్లలో తగ్గుదల సహా ప్రైవేట్ పెట్టుబడుల క్షీణత కారణంగానే జీడీపీ దిగజారినట్లు ఆర్థిక వేత్తలు విశ్లేషిస్తున్నారు.
జీడీపీ తగ్గుముఖం పట్టొచ్చని ఆర్బీఐ సైతం ఇటీవల పేర్కొంది. 2019-20 ఆర్థిక సంవత్సరానికి సంబంధించి దేశ జీడీపీ అంచనాలను ఇటీవల 7 శాతం నుంచి 6.9 శాతానికి తగ్గించిన ఆర్బీఐ.. మొదటి అర్ధభాగంలో 5.8 నుంచి 6.6 శాతం మధ్య నమోదు కావచ్చని పేర్కొంది. ద్వితీయార్ధంలో 7.3-7.5 శాతం మధ్య ఉండొచ్చని అంచనా వేసింది.
ఇదీ చూడండి: బ్యాంకింగ్ రంగ ప్రక్షాళన... ప్రభుత్వ బ్యాంకుల విలీనం
