Investment on Gold and Silver : ఈ ఏడాది మీ సొమ్ము బంగారమే

Investment on Gold and Silver : కొత్త సంవత్సరం వచ్చేసింది. కోటి ఆశలు మోసుకొచ్చింది. ఈ సంవత్సరంలో పెట్టుబడులు దేనిమీద పెట్టాలి? స్టాక్‌ మార్కెట్లా.. క్రిప్టో కరెన్సీయా.. కమాడిటీలా? ఇవే కాదు.. వెండి, బంగారాల మీదా పెట్టుబడి పెట్టవచ్చు. భవిష్యత్తులో ప్రపంచవ్యాప్తంగా జరిగే పరిణామాల కారణంగా ఈ రెండింటి ధరలు బాగా పెరిగే అవకాశాలు కనిపిస్తున్నాయి.

Investment on Gold and Silver : బంగారం.. వెండి.. ఈ రెండూ మరింత ధగధగలాడనున్నాయి. పది గ్రాముల స్వచ్ఛమైన బంగారం ధర రూ.60 వేలకు చేరే అవకాశాలు లేకపోలేవన్నది మార్కెట్‌ నిపుణుల అంచనా. వెండి కూడా అలాగే కనిపిస్తోంది. కరోనా నేపథ్యంలో వడ్డీ రేట్లు, ఈక్విటీ పెట్టుబడుల కన్నా బంగారం, వెండిలో పెట్టుబడులపైనే ప్రజలు ఆసక్తి చూపుతున్నారు. అత్యవసర సమయాల్లో విక్రయించుకునేందుకు వీలుగా ఉండటమే ఇందుకు కారణం.

బంగారానికి భారీ డిమాండ్..

Investment on Gold : ఉద్దీపన పథకాల పేరుతో అగ్రరాజ్యాలైన అమెరికా, జపాన్‌, చైనా, ఐరోపా దేశాలు భారీగా కరెన్సీ ముద్రించాయి. ఫలితంగా ద్రవ్యోల్బణం పెరిగి.. బంగారం డిమాండు ఆకాశాన్నంటుతోంది. హంగేరి, పోలండ్‌ లాంటి దేశాల రిజర్వు బ్యాంకులు ముందుజాగ్రత్తగా పెద్ద మొత్తంలో బంగారం కొంటున్నాయి. ఇటీవల కాలంలో బిట్‌కాయిన్లపై మోజు కొంత తగ్గటంతో ప్రజలు బంగారం కొనడమే మంచిదని భావిస్తున్నట్లు మార్కెట్‌ విశ్లేషకులు చెబుతున్నారు. ప్రపంచవ్యాప్తంగా ద్రవ్యోల్బణం అదుపుతప్పి, వడ్డీరేట్లు పెంచక తప్పని పరిస్థితి ఏర్పడితే, బంగారం ధర అనూహ్యంగా పెరుగుతుంది. అంటే, బంగారం పెట్టుబడి సమీప భవిష్యత్తులో లాభదాయకం కాబోతోందన్నమాట.

విద్యుత్తు వాహనాలతో వెండికి గిరాకీ

విద్యుత్ వాహనాల దిశగా అడుగులు..

Investment on Silver : భారతదేశం విద్యుత్తు వాహనాల దిశగా అడుగులు వేస్తోంది. సాధారణ వాహనాల కన్నా విద్యుత్తు వాహనాల్లో వెండి వినియోగం అవసరం. ఆ కారణంగా వెండి ధరలు పెరుగుతాయని అంచనా. ప్రస్తుతం కిలో వెండి ధర రూ.63,500 వరకు ఉంది. ఈ ఏడాది ఇది రూ.70 వేలకు చేరుకోవచ్చు. పెట్రోలు, డీజిల్‌ వాహనాల్లో వినియోగిస్తున్నదాని కన్నా ఒకటిన్నర నుంచి రెండు రెట్ల వరకు విద్యుత్తు వాహనాల్లో వెండిని వినియోగించాలి.

పెరుగుతున్న కొనుగోళ్లు..

Invest on Gold 2022 : అంతర్జాతీయంగా బంగారానికి డిమాండు పెరుగుతోందని హైదరాబాద్‌ నగర బంగారం వర్తకుల సంఘం అధ్యక్షుడు ప్రవీణ్‌భాయ్‌ చెప్పారు. బ్యాంకు వడ్డీ రేట్లు తక్కువగా ఉండటం, బంగారం ధరలు పెరుగుతుండటంతో కొనుగోలుదారులు ఆసక్తి చూపుతున్నారు. గత రెండున్నరేళ్ల కంటే ఇప్పుడు ఒక్కసారిగా కొనుగోళ్లు పెరుగుతున్నాయి. డిమాండు భారీగా పెరిగితే పది గ్రాముల బంగారం ధర రూ. 58-60 వేలవరకు చేరుకునే అవకాశం ఉంది.

• ఇదీ చదవండి :Financial Planning for 2022: కొత్త ఏడాదికి ఆర్థిక ప్రణాళిక వేసుకోండిలా..!