భారత్​ జోరు తగ్గింది- వృద్ధి లెక్క మారింది: ఫిచ్

సార్వత్రిక ఎన్నికలకు ముందు జీడీపీ వృద్ధి రేటు అంచనాలను తగ్గించింది ప్రముఖ రేటింగ్​ సంస్థ ఫిచ్​​. అభివృద్ధి కొంతమేర నెమ్మదించడమే ఇందుకు కారణమని వివరించింది.

సార్వత్రిక ఎన్నికల ముగింట జీడీపీ వృద్ధి అంచనాలను తగ్గించింది ఫిచ్​ రేటింగ్​ సంస్థ. వచ్చే ఆర్థిక సంవత్సరంలో వృద్ధిరేటు 7 శాతం ఉంటుందన్న అంచనాలను 6.8 శాతంగా సవరించింది.

"వచ్చే ఆర్థిక సంవత్సరానికి భారత జీడీపీ వృద్ధి అంచనాలను తగ్గిస్తున్నాం. దేశంలో అనుకున్న దాని కంటే అభివృద్ధి కొంచెం నెమ్మదించటమే ఇందుకు కారణం. 2020 ఆర్థిక సంవత్సరానికి 6.8 శాతం, 2021 ఆర్థిక సంవత్సరానికి 7.1 గా ఉండే అవకాశముంది" అని తాజా "గ్లోబల్​ ఎకనామిక్​ ఔట్​లుక్"​ నివేదికలో పేర్కొంది ఫిచ్​.

*కేంద్ర గణాంక సంస్థ ఈ ఆర్థిక సంవత్సరానికి జీడీపీ 7 శాతంగా ఉంటుందని అంచనా వేసింది.

ఫిచ్​ ప్రకటించిన జీడీపీ అంచనాలు:

సంవత్సరం	గత జీడీపీ వృద్ధి అంచనా	కొత్త అంచనాలు
2019	7.2	6.9
2020	7	6.8
2021	7.3	7.1

ప్రపంచం సంగతి:

ప్రపంచ జీడీపీ వృద్ధి అంచనాలను తగ్గించింది ఫిచ్​.

సంవత్సరం	గతంలో వృద్ధి రేటు అంచనా	కొత్త అంచనాలు
2018	3.3	3.2
2019	3.1	2.8

చైనా దగ్గరకు వస్తోంది:

పొరుగు దేశం చైనా గతంలో ప్రకటించిన జీడీపీ వృద్ధి అంచనాలు నిలబెట్టుకుంటుందని పేర్కొంది ఫిచ్​. 2018 ఆర్థిక సంవత్సరంలో 6.6 శాతం, 2019 ఆర్థిక సంవత్సరంలో 6.1 శాతంగా ఉంటుందని తెలిపింది.

చమురు ధరలు...ఆహార ధరలు:

సాగుకయ్యే వ్యయంపై చమురు ధరల పెరుగుదల ప్రభావం చూపిస్తుందని, ఇది ఆహార పదార్థాల ధరల పెరుగుదలకు దారితీస్తుందని ఫిచ్​ పేర్కొంది.

ఆర్బీఐ చర్యలు భేష్​:

ఫిబ్రవరిలో 0.25 శాతం వడ్డీ రేట్లు తగ్గిస్తూ ఆర్బీఐ తీసుకున్న నిర్ణయాన్ని సమర్థించింది ఫిచ్​. ద్రవ్యోల్బణం తగ్గడానికి ఈ చర్య తోడ్పడుతుందని వ్యాఖ్యానించింది. అంతర్జాతీయ పరిణామాలకు అనుకూలంగా ఈ సంవత్సరంలో ఆర్బీఐ మరో 25 బేస్​ పాయింట్లు తగ్గిస్తే ద్రవ్యోల్బణం అదుపులో ఉంటుందని ఫిచ్​ పేర్కొంది.