ఈపీఎఫ్ చందాదారులకు షాక్.. డిపాజిట్లపై వడ్డీ రేటు తగ్గింపు

ఈపీఎఫ్​ డిపాజిట్లపై ప్రస్తుత ఆర్థిక సంవత్సరానికి గాను వడ్డీ రేటు 8.50 శాతంగా నిర్ణయించింది కార్మిక శాఖ. గత ఆర్థిక సంవత్సరంతో పోలిస్తే వడ్డీ రేటును స్వల్పంగా తగ్గించింది.

ఈపీఎఫ్​ చందాదారులకు కేంద్రం షాకిచ్చింది. ప్రస్తుత ఆర్థిక సంవత్సరానికి(2019-20) సంబంధించి ఈపీఎఫ్​ డిపాజిట్లపై వడ్డీ రేటును 8.50 శాతంగా నిర్ణయించినట్లు కార్మిక శాఖ మంత్రి సంతోష్ గాంగ్వార్ తెలిపారు.

నేడు జరిగిన ఉద్యోగుల భవిష్య నిధి సంఘం (ఈపీఎఫ్​ఓ).. సెంట్రల్​ బోర్డ్​ ఆఫ్​ ట్రస్టీస్​(సీబీటీ) భేటీలో ఈ నిర్ణయం తీసుకున్నారు. కార్మిక శాఖ ప్రతిపాదనకు ఆర్థిక శాఖ ఆమోదం లభించాల్సి ఉంది.

గత ఆర్థిక సంవత్సరం (2018-19)లో ఆరు కోట్ల మంది ఈపీఎఫ్​ చందాదారులకు లబ్ధి చేకూరే విధంగా డిపాజిట్లపై 8.65 శాతం వడ్డీని ఇవ్వటం గమనార్హం.

గతంలో ఈపీఎఫ్​ వడ్డీ రేట్లు..

• 2017-18లో 8.55 శాతం
• 2016-17లో 8.65 శాతం
• 2015-16లో 8.88 శాతం
• 2014-15లో 8.75 శాతం
• 2013-14లో 8.75 శాతం
• 2012-13లో 8.50 శాతం

ఇదీ చూడండి:భారత్‌లో ఉద్యోగుల వేతనాల పెంపు 7.8 శాతమే!