EPF Transfer Online: ఉద్యోగులు ఎవరైనా ఓ సంస్థ నుంచి మరో సంస్థకు మారినప్పుడు తమ ఉద్యోగ భవిష్య నిధిని (ఈపీఎఫ్) బదిలీ చేసుకోవాలి. గతంలో ఈ పని చేయడానికి ఎన్నో ఇబ్బందులు ఎదుర్కొవాల్సి వచ్చేది. ఈపీఎఫ్ కార్యాలయం చుట్టూ తిరగాల్సి వచ్చేది. అయితే డిజిటలైజేషన్‌ పుణ్యమా అని ఇప్పుడా పని తప్పింది. ఇంటి వద్దే ఉండి సులభంగా ఈపీఎఫ్ను బదిలీ చేసుకునే వెసులుబాటు ఉంది.
ఈపీఎఫ్ బదిలీ చేయడమెలా?
- తొలుత ఈపీఎఫ్ఓ వెబ్‌సైట్‌ https://unifiedportal-mem.epfindia.gov.in/memberinterface లోకి వెళ్లి.. మీ యూఏఎన్‌, పాస్‌వర్డ్‌తో లాగిన్‌ అవ్వాలి.
- 'ఆన్‌లైన్‌ సర్వీసెస్‌'లో ఖాతా బదిలీ అభ్యర్థన కోసం 'వన్‌ మెంబర్‌-వన్‌ ఈపీఎఫ్ అకౌంట్‌' ఎంచుకోవాలి.
- తర్వాత మీ ప్రస్తుత వ్యక్తిగత, పీఎఫ్‌ ఖాతా సమాచారం సరి చూసుకోవాలి.
- ఇదే ఫారమ్‌లో కింద యూఏఎన్‌ లేదా పాత ఈపీఎఫ్ సభ్యత్వ ఐడీని మరోసారి ఎంటర్‌ చేస్తే మీ ఖాతా వివరాలు కనిసిస్తాయి.
- తర్వాత ప్రస్తుత, పాత సంస్థల్లో దేనికి ఖాతా బదిలీ చేయాలనుకుంటున్నారో ఎంటర్‌ చేసి 'గెట్‌ డిటెల్స్‌'పై ఓటీపీ కోసం క్లిక్ చేయాలి.
- యూఏఎన్‌ రిజిస్టర్‌ మొబైల్‌ నంబర్‌కు వచ్చిన ఓటీపీనీ నమోదు చేసి సబ్మిట్ బటన్పై క్లిక్ చేయాలి.
మీరు ఓటీపీ ఎంటర్‌ చేసిన తరువాత ఆన్‌లైన్‌ ద్వారా బదిలీ ప్రాసెస్‌ అభ్యర్థన మీ సంస్థకు చేరుతుంది. మీ కంపెనీ ధ్రువీకరణ తర్వాత ఈపీఎఫ్ఓ.. మీ ఈపీఎఫ్ ఖాతాను ఆన్లైన్లో బదిలీ చేస్తుంది. ఆన్‌లైన్‌ సర్వీసెస్‌ మెనూలోని 'ట్రాక్‌ క్లెయిమ్‌ స్టేటస్‌' ఆప్షన్‌ ద్వారా మీ ఈపీఎఫ్ బదిలీ స్థితిని తెలుసుకోవచ్చు.