భారత ఔషధ రంగానికి కొవిడ్-19 వ్యాక్సిన్ భారీ వ్యాపార అవకాశాన్ని తెచ్చిపెట్టే సూచనలు కన్పిస్తున్నాయి. రానున్న మూడేళ్లలో దేశీయ సరఫరా, వివిధ దేశాలకు ఎగుమతుల ద్వారా ఈ రంగం 10 బిలియన్ డాలర్ల నుంచి 11 బిలియన్ డాలర్ల వ్యాపారం చేసే వీలుందని కేర్ రేటింగ్స్ నివేదిక అంచనా వేసింది.
ధరల్లో భారీ వ్యత్యాసం..
అయితే అమెరికాకు చెందిన బహులజాతి ఔషధ సంస్థల్లా.. అధిక ధరల ఫలితాలను భారత్ ఆస్వాదించడం కష్టమేనని నివేదిక వివరించింది.
అమెరికా ఫార్మా కంపెనీలు కరోనా వ్యాక్సిన్ ఒక డోసు ధరను 15 డాలర్ల నుంచి 25 డాలర్లుగా ఉంచాయి. భారత కంపెనీలు మాత్రం ఒక డోసు ధరను 3.25 డాలర్ల నుంచి 3.50 డాలర్ల వరకు వద్ద మాత్రమే ఉంచాయని నివేదిక పేర్కొంది.
ఈ నేపథ్యంలో.. భారత ఫార్మా రంగానికి వచ్చే మూడేళ్లలో 10-11 బిలియన్ డాలర్ల(దాదాపు రూ.81వేల కోట్లు) విలువైన కొవిడ్ వ్యాక్సిన్ సరఫరాకు అవకాశాలు (దేశీయంగా, ఎగుమతులు కలిపి) ఉన్నట్లు నివేదిక అభిప్రాయపడింది.
ఆ దేశాల నుంచి భారీ డిమాండ్..
దేశీయంగా 2022 మార్చి నాటికి టీకా మెజారిటీ డిమాండ్ పూర్తవుతుందని అంచనా వేసింది ఈ నివేదిక. ఐరోపా, ఉత్తర అమెరికా, అభివృద్ధి చెందిన ఆసియా దేశాలకు టీకా ఎగుమతి చేసే అవకాశాలు మెండుగా ఉన్నట్లు వివరించింది.
చైనా, జపాన్, పలు దక్షిణ అమెరికా దేశాలు మినహా.. ఆఫ్రికా, ఆసియా దేశాల్లో వ్యాక్సినేషన్ నెమ్మదిగా కొనసాగుతోందని నివేదిక పేర్కొంది. ఆయా ప్రాంతాల్లో వ్యాక్సిన్ డిమాండ్ 1.25 బిలియన్ డాలర్ల కన్నా ఎక్కువగా ఉండొచ్చని అభిప్రాయపడింది.
ఇప్పటి వరకు ఉన్న డేటా ప్రకారం.. ఆగస్టు 10 నాటికి ప్రపంచవ్యాప్తంగా 4.35 బిలియన్ డోసులు వినియోగమయ్యాయి. అమెరికా, చైనా, ఐరోపా దేశాల్లో వ్యాక్సిన్ తీసుకునేందుకు అర్హులైన వారిలో 50 శాతం మందికి కనీసం ఒక డోసు వ్యాక్సినేషన్ పూర్తయినట్లు తెలిసింది.
అప్పుడే ప్రపంచం సేఫ్..
అయితే ప్రపంచవ్యాప్తంగా 70 శాతానికిపైగా ప్రజలకు వ్యాక్సినేషన్ పూర్తయితేనే కరోనా నుంచి సురక్షిత వాతావరణం నెలకొంటుందని కేర్ నిపుణులు చెబుతున్నట్లు రేటింగ్ ఏజెన్సీ పేర్కొంది.
భారత్ విషయానికొస్తే.. ఆగస్టు 10 నాటికి దేశవ్యాప్తంగా 50 కోట్ల మంది అర్హులు కనీసం ఒక డోసు టీకా తీసుకున్నారు. దేశంలో సంపూర్ణ వ్యాక్సినేషన్ పూర్తయ్యేందుకు ఇంకా కనీసం 200 కోట్ల డోసులు అవసరమవుతాయని అంచనాలున్నాయి. ప్రస్తుతం దేశవ్యాప్తంగా రోజుకు 50-55 లక్షల మంది వ్యాక్సిన్ తీసుకుంటున్నారు. డిమాండ్ భారీగా ఉన్నప్పటికీ సరఫరా తగినంత లేకపోవడం వల్ల చాలా రోజులుగా వ్యాక్సినేషన్ స్థిరంగా ఉన్నట్లు తెలుస్తోంది.
దేశంలో ప్రస్తుతం ఐదు వ్యాక్సిన్లు అత్యవసర వినియోగంలో ఉన్నాయి. మరో మూడు వ్యాక్సిన్లు వినియోగ అనుమతుల దశలో ఉన్నాయి.
ఇదీ చదవండి:యువత.. పెట్టుబడులు పెడుతున్నారా?
