పెట్టుబడులు, ఆస్తులకు సంబంధించిన పత్రాలను మనం చాలా జాగ్రత్తగా కాపాడుకుంటాం. పెట్టుబడులన్నీ డిజిటల్‌ రూపంలోకి మారిన నేపథ్యంలో వాటి వివరాలు ఈ-మెయిల్‌ లేదా మొబైల్‌ సంక్షిప్త సందేశాల రూపంలోనే ఉంటున్నాయి. కొన్నిసార్లు వాటిని పొరపాటున తీసేస్తే.. మళ్లీ వాటిని పొందేందుకు చాలా కష్టపడాల్సి వస్తుంది. ఇలాంటి సందర్భాలు ఎదురుకాకుండా.. పత్రాలను మనం ఎలా భద్రపర్చుకోవాలో చూద్దాం..
బ్యాంకు ఖాతాలు:
బ్యాంకు పొదుపు ఖాతాలు, తీసుకున్న రుణాలకు సంబంధించిన వివరాలన్నీ కావాల్సినప్పుడు చూసుకునే వీలుండాలి. ముఖ్యంగా గృహరుణ వివరాలు, ఇతర అప్పుల పత్రాలు ఒకేచోట ఉండేలా చూసుకోవాలి. తీర్చిన అప్పుల తాలూకు ఎన్‌ఓసీలు లేదా నో డ్యూ సర్టిఫికెట్లను కనీసం 5-8 ఏళ్లపాటు జాగ్రత్త చేసుకోవాలి. గృహరుణం పూర్తిగా తీర్చేసిన తర్వాత.. మన ఆస్తుల మీద ఉన్న తనఖాను రద్దు చేసుకోవాలి. ఆ పత్రాన్నీ దాచిపెట్టాలి. మీరు ఇంటి మరమ్మతు కోసం తీసుకునే రుణాల వివరాల పత్రాలనూ తీసి పెట్టుకోండి. మీరు ఇల్లు అమ్మినప్పుడు మూలధన లాభం లెక్కించే సందర్భాల్లో ఇవి ఎంతో ఉపయోగపడతాయి. పొదుపు ఖాతాల వివరాలు, చెక్కులు అన్నీ ఒకేచోట ఉన్నాయా ఒకసారి తనిఖీ చేయండి. నెలనెలా వచ్చే బ్యాంకు స్టేట్‌మెంట్‌ను కనీసం మూడేళ్ల వరకూ అట్టిపెట్టుకోండి.
బీమా:
ఇప్పుడు బీమా పాలసీలను చాలామంది ఆన్‌లైన్‌లో తీసుకుంటున్నారు. దీంతో వారి ఈ-మెయిళ్లలోనే పత్రాలు ఉంటున్నాయి. జీవిత, ఆరోగ్య, వాహన బీమా ఆన్‌లైన్‌లో తీసుకున్నా వాటి ప్రింటులను తీసుకొని, మనం జాగ్రత్త చేసుకోవాలి. ముఖ్యంగా జీవిత, ఆరోగ్య బీమా పాలసీలు. జీవిత బీమాకు నామినీగా ఉన్నవారికి పాలసీ పత్రాలు ఎక్కడ ఉన్నాయన్న సంగతి స్పష్టంగా తెలిసి ఉండాలి. ఆరోగ్య బీమా పాలసీ కార్డులు ఉంటే.. అవి కుటుంబ సభ్యులందరికీ అందుబాటులో ఉండేలా చూసుకోండి. వాహన బీమా పత్రాల నకళ్లను ఇంట్లో.. కారులోనూ ఉంచుకోండి.