అనాథ వృద్ధురాళ్లకు అతడు మరో కొడుకు

అతడు ముస్లిం యువకుడు. సామాజిక కట్టుబాట్లను పక్కనపెట్టి ఓ అనాథ వృద్ధురాలికి తలకొరివి పెట్టాడు. హన్మకొండకు చెందిన హకీం పర్వేజ్ హైందవ సంప్రదాయం ప్రకారం అంత్యక్రియలు నిర్వహించి మానవత్వాన్ని చాటుకున్నాడు. అతని కుటుంబానికి హిందూ ముస్లిం అనే తేడా లేదు. అందరినీ... ఆదరిస్తారు. వీరు నడుపుతున్న సహృదయ ఆశ్రమంలో ఎంతోమంది కన్నబిడ్డల ఆదరణకు నోచుకోని తల్లిదండ్రులు ఆశ్రయం పొందుతున్నారు. ఆ వృద్ధులను కంటికిరెప్పలా చూసుకుంటూ.. వారికి అండగా నిలబడుతోంది సహృదయ అనాథ వృద్ధాశ్రమం.

ఓ దంపతులు అనాథ వృద్ధులకు ఆశ్రయం కల్పించి ఆదరిస్తే... వారి కుమారుడు వసతిగృహంలో తనువు చాలించిన వృద్ధులకు తల కొరివి పెట్టి మానవత్వాన్ని బతికిస్తున్నాడు. కన్న బిడ్డలు కాదనుకున్న తల్లిదండ్రులకు ఆ యువకుడు దేవుడిచ్చిన బిడ్డలా.. కర్మకాండ నిర్వహిస్తున్నాడు.

తల్లిదండ్రుల బాటలో...

హన్మకొండలో సహృదయ అనాథ వృద్ధాశ్రమం ద్వారా చోటే మియా, యాకూబ్ బి ముస్లిం దంపతులు ఎంతోమందికి ఆశ్రయం కల్పిస్తున్నారు. కన్న బిడ్డలు కాదని బజారున పడేసిన వృద్ధులకు కుమార్తె ప్రేమను, కుమారుడి ఆప్యాయతను పంచుతున్నారు. వీరి నీడలో తనువు చాలించిన వారికి ముస్లిం దంపతులే కర్మకాండ నిర్వహించి మానవత్వాన్ని చాటుతున్నారు. తల్లిదండ్రుల సేవా భావాన్ని చూసి చలించిపోయిన వీరి కుమారుడు హకీం పర్వేజ్ వారి ఆశయాలను పంచుకునేందుకు ముందుకు వచ్చాడు.

నా తలకొరివి నువ్వే పెట్టాలి బిడ్డా!

ఆశ్రమంలో ఐదేళ్ల నుంచి ఉంటున్న ఓ వృద్ధురాలు తనువు చాలించింది. తాను చనిపోతే తల కొరివి నువ్వే పెట్టాలన్న వృద్ధురాలి కోరిక మేరకు హిందూ సంప్రదాయం ప్రకారం దహన సంస్కారాలు నిర్వహించాడు పర్వేజ్. సామాజిక కట్టుబాట్లు కన్నా... మానవత్వమే తమ మతం అని నిరూపించాడు. సహృదయ వృద్ధాశ్రమం నిర్వహిస్తున్న ముస్లిం దంపతులు పలువురికి ఆదర్శంగా నిలుస్తున్నారు. మానవత్వం పరిమళించే మంచి మనుషులు అంటూ చుట్టుపక్కల వారంతా కొనియాడారు.

ఇదీ చూడండి: ప్రేమ వేధింపులకు విద్యార్థిని ఆత్మహత్య