తెలంగాణలో గెలిచిన సిట్టింగ్ ఎంపీలు... తెలంగాణ పార్లమెంట్ ఎన్నికల్లో పోటీ చేసిన సిట్టింగ్ ఎంపీల్లో నలుగురు విజయభేరీ మోగించారు. ప్రజల్లో తమపై గల నమ్మకాన్ని నిరూపించుకున్నారు. పోటీ చేసిన 8మంది సిట్టింగ్ ఎంపీలలో బి.బి పాటిల్, కొత్తప్రభాకర్రెడ్డి, పసునూరి దయాకర్, అసదుద్దీన్ ఒవైసీలు జయకేతనం ఎగురవేశారు.
సంక్షేమమే అస్త్రం
జహీరాబాద్ లోక్సభ పోరులో తెరాస అభ్యర్థి బీబీ పాటిల్ విజయం సాధించారు. కాంగ్రెస్ అభ్యర్థి మదన్ మోహనరావుపై 4,471 ఓట్ల తేడాతో గెలుపొందారు. తెరాస సంక్షేమ పథకాలను ప్రజల్లోకి బలంగా తీసుకెళ్లడంలో ఆ పార్టీ నేతలు సఫలీకృతులయ్యారు.
వరుసగా నాలుగోసారి..
హైదరాబాద్ పార్లమెంట్ స్థానంపై అసదుద్దీన్ మరోసారి జెండా ఎగురవేశారు. వరుసగా నాలుగోసారి విజయం సాధించారు. భాజపా అభ్యర్థి భగవంత్ రావుపై 2 లక్షల 70వేల ఓట్ల మెజార్టీతో గెలుపొందారు.
ఖిల్లాపై మరోసారి గులాబీ జెండా
ఓరుగల్లు ఖిల్లాలో గులాబీ జెండా ఎగిరింది. తెరాస అభ్యర్థి పసునూరి దయాకర్ భారీ మెజార్టీతో గెలుపొందారు. గత ఉప ఎన్నికల్లో 4 లక్షల 59 వేల మెజార్టీ సాధించి.... రికార్డు నెలకొల్పిన పసునూరి దయాకర్ ఈ సారి 2 లక్షల 79 వేల 888 ఓట్ల ఆధిక్యంతో గెలుపొందారు.
ఊహించిన విజయమే..
అందరూ ఊహించినట్లుగానే మెదక్ పార్లమెంటరీ స్థానంలో తెరాస నేత కొత్త ప్రభాకర్రెడ్డి ఘన విజయం సాధించారు. కాంగ్రెస్ అభ్యర్థి గాలి అనిల్కుమార్పై 3లక్షలకు పైగా ఓట్ల మెజారిటీతో జయభేరీ మోగించారు. ప్రభాకర్రెడ్డి విజయం సాధించటం వల్ల గులాబీ శ్రేణులు సంబురాల్లో మునిగిపోయారు.
సార్వత్రిక ఎన్నికల ఫలితం పూర్తి ట్యాలీ కోసం ఇక్కడ క్లిక్ చేయండి
