1 నుంచి తెలంగాణలో రాహుల్ సుడిగాలి పర్యటనలు

నామినేషన్ల ప్రక్రియ ముగిసింది. నేతలంతా ప్రచారంపై దృష్టి పెట్టారు. ఇప్పటికే కాంగ్రెస్ అభ్యర్థులు ప్రచారంలో దూసుకుపోతున్నారు. జాతీయ నేతలతో బహిరంగ సభలు నిర్వహించాలని పీసీసీ నిర్ణయించింది. ఏప్రిల్ ఒకటి నుంచి రాహుల్ షెడ్యూలు ఖరారు చేసింది.

ఎన్నికల ప్రచారానికి కాంగ్రెస్‌ శ్రీకారం చుట్టింది. ఏఐసీసీ అధ్యక్షుడు రాహుల్‌ గాంధీతో పాటు ఇతర ముఖ్య నేతలు, సినీ నటులు రాష్ట్రంలో ప్రచారం చేయనున్నారు. ఇప్పటికే రాహుల్ పర్యటన షెడ్యూలును పీసీసీ ప్రకటించింది. ఏప్రిల్ 1న జహీరాబాద్, నాగర్ కర్నూల్, నల్గొండ లోక్​సభ స్థానాల్లో ఎన్నికల సభలో పాల్గొంటారని తెలిపింది.

ఏప్రిల్‌ ఒకటిన మధ్యాహ్నం 12 గంటలకు జహీరాబాద్‌ పార్లమెంటు నియోజకవర్గంలో జరిగే ప్రచార సభలో రాహుల్ గాంధీ పాల్గొంటారు. అనంతరం నాగర్‌ కర్నూల్‌ పరిధిలోని వనపర్తిలో మధ్యాహ్నం 2 గంటలకు బహిరంగ సభలో ప్రసంగిస్తారు.

సోనియా గాంధీ, మాజీ ప్రధాని మన్మోహన్‌ సింగ్‌, లోక్​సభ మాజీ స్పీకర్‌ మీరాకుమార్, మల్లికార్జున ఖర్గేలతోపాటు పలువురు ముఖ్యనేతల ప్రచార కార్యక్రమాల షెడ్యూల్‌ త్వరలో ఖరారు అవుతుందని కాంగ్రెస్‌ వర్గాలు తెలిపాయి.